Hindiston osmonida yana motam: vertolyot halokati hayotlarni olib ketdi

Hindistonning Uttarakxand shtati osmonida 14 iyun kuni ertalab ko‘ngilsiz fojea yuz berdi — Aryan Airlines xususiy aviashirkatiga tegishli vertolyot Kedarnathdan Guptkarshiga uchib ketayotgan paytda halokatga uchradi. Rasmiy ma’lumotlarga ko‘ra, bortida bo‘lgan yetti kishi halok bo‘lgan. Bu haqda Times of India nashri manbalarga tayanib xabar berdi.

Aviahalokatning dastlabki sababi sifatida noqulay ob-havo sharoiti qayd etilmoqda. Quvvatli yomg‘ir va tuman vertolyotning samarali parvozini cheklagani taxmin qilinmoqda. Hozirda voqea joyida qutqaruv xizmatlari va politsiya guruhlari ish olib bormoqda. Qidiruv va jarohatlanganlarni evakuatsiya qilish ishlari davom etmoqda.

Shtat bosh vaziri Pushkar Singx Dhami halok bo‘lganlar oilalariga chuqur ta’ziya bildirdi va barcha tegishli xizmatlarga faol harakat qilish bo‘yicha ko‘rsatma berganini ma’lum qildi:
“Vertolyot halokati haqidagi xabar juda alamli. Barcha mahalliy hokimiyat va qutqaruv guruhlari ushbu fojeaning oqibatlarini bartaraf etish uchun safarbar qilingan,” — dedi u o‘z bayonotida.

Bu voqea so‘nggi haftalarda Hindiston aviatsiya sohasida kuzatilayotgan ilk fojea emas. 12 iyun kuni Ahmadobod shahrida Air India aviakompaniyasiga tegishli, bortida 242 nafar yo‘lovchi bo‘lgan samolyot tibbiyot kolleji binosiga qulagan edi. Afsuski, faqat bir kishi tirik qolgan. Bu mudhish hodisa butun mamlakatda ko‘plab muhokamalarga sabab bo‘ldi.

Air India rahbariyati halok bo‘lganlar oilasiga 10 million rupiy (taxminan 117 ming AQSH dollari) kompensatsiya to‘lashini ma’lum qildi. Jarohatlangan yagona tirik qolgan shaxsga tibbiy va moddiy yordam va’da qilindi.

Hindiston rasmiylari ushbu ikki halokatdan so‘ng barcha aviatsiya texnikasi, xususan, vertolyot va samolyotlarning texnik holatini qat’iy tekshirish, parvozlar uchun belgilangan xavfsizlik shartlarini qayta ko‘rib chiqish va nazoratni kuchaytirish bo‘yicha faol harakat boshlaganini bildirishdi.

Fojealar takrorlanmasligi uchun xavfsizlik — birinchi o‘rinda bo‘lishi shart. Zero, har bir parvoz — inson hayotini eltadi. “Zamin”ni Telegramʻda oʻqing!