Tramp Eron bo‘yicha qaror qarshisida: AQSHda xavotir va ziddiyat kuchaymoqda

Oq uy devorlari ostida yana muhim va jiddiy masalalar muhokama qilinmoqda. Amerika prezidenti Donald Tramp va uning milliy xavfsizlik bo‘yicha maslahatchilari o‘rtasida o‘tgan so‘nggi uchrashuv, rasmiy manbalarga ko‘ra, bir soatdan ortiq davom etgan va ayni paytda AQSH tashqi siyosatidagi eng dolzarb muammolardan biriga aylangan Eron-Isroil munosabatlari yuzasidan o‘ziga xos nuqta qo‘ygani yo‘q.

17 iyun, seshanba kuni CNN telekanali tarqatgan xabarga ko‘ra, Oq uyda o‘tkazilgan yig‘ilishda Tramp Isroilning Eronga qarshi ehtimoliy harbiy amaliyotiga AQSH qo‘shilishi mumkinligini jiddiy muhokama qilgan. Prezident ushbu variantni shaxsan o‘rganayotgani ma’lum bo‘ldi. Biroq, uning maslahatchilari ushbu masalada yagona fikrga kela olmayotgani ma’lum qilindi – Oq uyda bu borada ixtilof va qarama-qarshiliklar bor.

CBS Newsning Oq uy muxbiri Sara Kukning ta’kidlashicha, hatto Tramp atrofidagi kengashchilar orasida ham to‘liq birlik yo‘q. Bu orasida Amerika siyosiy elitasida fikrlar butunlay bo‘linib ketgani ayon bo‘lmoqda. Kimdir xavfsizlik nuqtayi nazaridan ehtiyotkorlikni talab qilsa, yana kimdir Eronga nisbatan qattiqroq choralar ko‘rishni taklif qilmoqda.

Shu paytda, CNN ma’lumotlariga ko‘ra, AQSH so‘nggi kunlarda Yaqin Sharq mintaqasiga 30 dan ziyod harbiy samolyotlarini joylashtirgan. Manbalar fikricha, Tramp Amerika harbiy-havo kuchlariga Isroil samolyotlariga yonilg‘i quyish yoki boshqa logistik yordam ko‘rsatish bo‘yicha topshiriq berishi mumkin. Bu esa mintaqadagi mojaro yanada avj olishi ehtimolidan darak beradi.

The New York Times gazetaci esa o‘zining manbalaridan iqtibos keltirib, AQSH agar Isroilga qo‘shilib, Eronning Fordodagi muhim yadroviy inshootiga zarba bersa, Tehron allaqachon Amerika bazalariga qarshi raketa va boshqa qurollarni tayyorlab qo‘yganini ma’lum qildi. Bu esa mojaro kengayib ketishi xavfini yanada oshirmoqda.

Bundan tashqari, Vashington Yamandagi husiylar tomonidan Qizil dengizdagi kemalarga hujumlar kuchayishi, Iroq va Suriyadagi eronparast kuchlar esa u yerdagi AQSH bazalariga to‘g‘ridan to‘g‘ri zarba berishidan xavotirda. Bu holatda AQSHning butun Yaqin Sharq mintaqasidagi manfaatlari xavf ostida qolishi mumkin.

Jumladan, ekspertlar fikricha, agar Vashington ushbu mojarodan chetda qolsa, mintaqadagi nufuzini yo‘qotishi ehtimoli bor. Agar qo‘shilsa, katta harbiy to‘qnashuv va yangi geosiyosiy muammolarga yo‘l ochilishi mumkin.

Oqibatda, AQSH siyosiy va harbiy elitasi oldida o‘ta murakkab tanlov turibdi: bir tomondan, xalqaro xavfsizlik va davlat manfaatlari, ikkinchi tomondan esa mintaqadagi tinchlik va barqarorlikni saqlab qolish. Ko‘rinadiki, Trampning har qanday qarori nafaqat Amerika, balki butun jahondagi vaziyatga ta’sir ko‘rsatadi. “Zamin”ni Telegramʻda oʻqing!