Global qahva narxlari tarixiy rekord darajaga yetgan

Qahva sanoati vakillari fikricha, ketma-ket hosildorlik tanqisligi kuzatilgan yillardan so‘ng, global qahva zaxiralarini tiklash uchun kamida ikki yildagi barqaror va serhosil mavsumlar zarur bo‘ladi. Bu xulosa 4-iyul kuni Braziliyada bo‘lib o‘tgan Coffee Dinner & Summit tadbirida bildirildi.

2025-yil boshida global qahva narxlari tarixiy rekord darajaga yetdi. Narxlarning ko‘tarilishi, asosan, ishlab chiqarishdagi uzilishlar va barqaror darajadagi, ayrim bozorlar bo‘yicha esa oshib borayotgan talab bilan bog‘liq. Hatto Braziliyada 2026-2027 mavsumida kutilayotgan katta hosil ham iste’molchilarga tezkor yengillik olib kelmasligi mumkin.

Cooxupe kooperativi kompaniyasi tijorat bo‘yicha superintendenti Luiz Fernando dos Reis bu haqda quyidagicha izoh berdi:

“Joriy yilgi hosildan keyingi mavsumda zaxiralarni to‘ldirishga erisha olamiz, deb o‘ylamayman. Buning uchun kamida ikki yil ketma-ket yaxshi hosil olishimiz kerak bo‘ladi.”

Xalqaro savdo kompaniyasi Louis Dreyfus Company qahva tadqiqotlari bo‘yicha direktori Charlz Chiapolino esa quyidagicha ta’kidladi:

“To‘rt yil avvalgi zaxira darajasiga qaytish uchun, hamma narsa ijobiy kechgan taqdirda ham, kamida ikki yillik yuqori hosildorlik kerak bo‘ladi. Biroq global iqlim sharoitining ketma-ket ikki yil barqaror bo‘lishi — deyarli imkonsiz holat.”

Kolumbiya Qahva Yetishtiruvchilari Federatsiyasi bosh direktori German Bahamon ham global talab barqaror yoki ayrim mintaqalarda o‘sib borayotgan bir paytda, zaxiralarni to‘plashning amalda murakkabligini ta’kidladi:

“Talab hozirgi darajada barqaror yoki o‘sishda davom etayotgan paytda hech kim katta miqdorda zaxira yig‘a olmaydi.”

Cooxupe vakili Reisning aytishicha, Braziliyada 2026-2027 yilgi mavsumda yuqori hosil bo‘lishi mumkin, ammo mamlakatda keng tarqalgan arabika navi har ikki yilda bir marta yuqori hosil beradigan siklga ega. Shuning uchun 2027-2028 yilgi mavsumdagi hosildan yuqori natija kutish qiyin bo‘lishi mumkin.

Global qahva bozoridagi tanqislikni bartaraf etish tezkor jarayon emas. Mutaxassislarning fikricha, barqaror ta’minotni tiklash uchun nafaqat ob-havoga, balki bozor muvozanatiga ham ehtiyotkorlik bilan yondashish talab etiladi. Shuning uchun yaqin yillarda qahva narxlari yuqori bo‘lib qolishi mumkin. “Zamin”ni Telegramʻda oʻqing!