Chechenistonning Ukraina urushiga qo‘shayotgan “hissasi” ortidagi katta raqamlar

So‘nggi yillarda Chechenistonning Ukrainadagi urushdagi ishtiroki yanada ko‘lam oladi, deb xabar berdi @Kadyrov_95 telegram kanali. Respublika rahbari Ramzan Qodirovning so‘zlariga ko‘ra, bugungacha Chechenistondan 60 mingdan ziyod jangchi jang maydoniga yuborilgan, ular orasida 22 mingdan ortig‘i ko‘ngillilar hisoblanadi. Hozirda esa front chizig‘ida, Rossiya Mudofaa vazirligi, Rosgvardiya, “Axmat” maxsus bo‘linmalari va Checheniston Ichki ishlar vazirligi safida 13 ming atrofidagi yigitlar xizmat qilmoqda.

2024 yil may oyida Qodirov Rossiya prezidenti bilan uchrashuvda urush boshlanganidan buyon 55,5 mingdan ortiq chechen jangchisi yuborilganini ma’lum qilgandi. Shu bilan birga, xavfsizlik kuchlari umumiy soniga kazarma sharoitida bo‘lgan, ta’tildagi yoki rotatsiya doirasida qaytgan harbiylar kiritilmagan. Ayrim huquq himoyachilari Chechenistonda kontrakt imzolashga majburlash holatlari mavjudligini ta’kidlashadi.

Chechenistonning urush uchun moddiy va texnik “hissasi” ham ko‘zga tashlanmoqda. Joriy yil boshida Ramzan Qodirov frontga Xitoyda ishlab chiqarilgan beshta Changan zirhli pikap yuborgani haqida ma’lum qildi. Avvalroq esa, Rossiya bo‘linmalariga avtotransport, dron va harbiy anjomlar yetkazilgani e’lon qilingan edi. 2024 yil oktyabrda Qodirov “Rossiya uchun xalq fronti” harakatiga 100 ta maxsus “jihod mashinasi” berishini ma’lum qilgandi. Shuningdek, Checheniston rahbariyati urush uchun 78 ta UAZ “Patriot”, UAZ-452 va “Niva” avtomobillarini ham yuborgan.

“Rossiya qahramoni Ahmad-Hoji Qodirov” nomidagi jamg‘arma urushdagi texnik ta’minlash va moddiy yordam bilan ham faol. Urush davomida jamg‘arma orqali 2 515 dona maxsus avtotransport, 12 650 dona kvadrokopter (dron), 32 781 dona aloqa vositasi va 112 857 to‘liq harbiy jihoz to‘plami xarid qilingan. Jamg‘armaning urush uchun jami xarajatlari 40 milliard rubldan (500 million dollardan ortiq) oshib ketgan.

Mazkur ma’lumotlar Chechenistonning Ukrainadagi urushga faqat jangchilar emas, balki logistika va moddiy jihatdan ham katta hissa qo‘shayotganini ko‘rsatmoqda. Bu jarayonda yuborilayotgan texnika, dron va jihozlar frontdagi qo‘shinlar imkoniyatini kengaytirayotgani, Qodirov va uning jamoasi esa bu orqali Moskva huzurida o‘ziga xos nufuzni saqlab qolayotgani qayd etiladi.

Yaqin kelajakda Chechenistonning bu kabi faol ishtiroki Rossiya–Ukraina urushi jarayonida yana qanday o‘zgarishlarga olib kelishi mumkinligi esa tahlilchilar diqqat markazida qolmoqda. “Zamin”ni Telegramʻda oʻqing!