Jota halokatidagi tafsilotlar: avtohalokatning dastlabki sabablari ma’lum bo‘ldi

Portugaliya va jahon futbolini qayg‘uga solgan Diogu Jota va uning ukasi Andre Silva bilan bog‘liq avtohalokatning dastlabki sabablari ma’lum bo‘ldi. Bu haqda Ispaniyaning “El Mundo” nashri tergovga yaqin manbalarga tayanib xabar berdi.

Eslatib o‘tamiz, 3 iyul kuni “Liverpul” hujumchisi va Portugaliya ikkinchi ligasida to‘p surgan ukasi Ispaniyaning Samora viloyatida halokatga uchragan, natijada har ikkisi ham halok bo‘lgan edi.

G‘ildirak muammosi va tezlik — halokat sabablarimi?

Tergovchilar halokatdan so‘ng hodisa joyini sinchiklab o‘rganishdi. Asfaltda qolgan izlar, g‘ildiraklar va yong‘indan so‘ng saqlanib qolgan shaxsiy buyumlar asosida xulosalar chiqarilmoqda. Dastlabki ma’lumotlarga ko‘ra, avariyaga yetaklagan omillar — transport vositasining g‘ildiragi bilan bog‘liq texnik nosozlik va harakatdagi yuqori tezlik bo‘lishi mumkin.

Rulda kim bo‘lgan?

Eng qiziq nuqta — avtomobil boshqaruvida aynan Diogu Jota bo‘lgani haqida. Tergov guruhi shu fikrga kelgan, ammo bu ma’lumot hozircha to‘liq tasdiqlanmagan. Avtomobildagi yo‘lovchilarning shaxsi qattiq yong‘in sababli faqat shaxsiy buyumlar orqali aniqlangan.

E’tiborda: Jota va ukasining so‘nggi sayohati

Hodisadan so‘ng Portugaliya va Ispaniyadagi ko‘plab muxlislar, jamoalar va sport arboblari marhumlarga hamdardlik bildirdi. Diogu Jota uchun butun futbol olami motam tutdi.

Bu fojia nafaqat Jota oilasi, balki butun futbol jamoatchiligi uchun og‘riqli yo‘qotish bo‘ldi. Unisi aniq: yuqori tezlik va texnik nosozlik — hamisha falokatga sabab bo‘lishi mumkin.

Siz bu vaziyat haqida nima deb o‘ylaysiz? Yo‘lda xavfsizlikning eng muhim omili nimada? “Zamin”ni Telegramʻda oʻqing!