Trampdan yangi tariflar: mis, dori va elektronikada savdo bosimi ortmoqda

AQSH prezidenti Donald Tramp xalqaro savdo siyosatida yana bir katta qadam tashladi — u mamlakatga olib kiriladigan misga 50 foizlik boj joriy etilishini e’lon qildi. Bu nafaqat iqtisodchilar, balki global bozor ishtirokchilari orasida ham katta qiziqish uyg‘otdi.

Yangi tariflar elektromobillar, harbiy texnika, elektr infratuzilmalari va iste’mol tovarlari uchun zarur bo‘lgan metall ishlab chiqarish tarmoqlariga ta’sir ko‘rsatishi kutilmoqda. AQSHda mis fyucherslari bu xabardan so‘ng 10 foizdan ko‘proq oshgani kuzatildi.

Bundan tashqari, Tramp hukumatining rejasiga ko‘ra, yaqin kelajakda yarimo‘tkazgichlar va farmatsevtika mahsulotlariga ham qattiq bojlar joriy etilishi mumkin. Ayniqsa, dori-darmonlar importi uchun 200 foizlik boj haqidagi ehtimoliy qaror AQSH farmatsevtika kompaniyalari aksiyalariga salbiy ta’sir ko‘rsatdi.

Shu bilan birga, AQSH prezidenti tariflarni joriy etishda muayyan muddatlar bo‘lishi mumkinligini aytdi. Unga ko‘ra, ayrim bojlar 2026 yilga qadar kechiktirilishi ehtimoldan xoli emas.

Ekspertlar fikricha, bu qadamlar AQSHning ichki ishlab chiqaruvchilarini himoya qilishga qaratilgan bo‘lsa-da, xalqaro miqyosda savdo urushlarining yanada avj olishiga olib kelishi mumkin.

Siz nima deb o‘ylaysiz: AQSHning bunday iqtisodiy bosimi jahon bozorida qanday oqibatlarga olib kelishi mumkin? “Zamin”ni Telegramʻda oʻqing!