Putin va Tramp: Ukraina taqdiri atrofidagi siyosiy shaxmat o‘yini

Rossiya va G‘arb o‘rtasidagi siyosiy tortishuvlar yana avj oldi. The New York Times manbalariga tayanib yozganidek, Kremlda Vladimir Putin Ukraina ustidan ustunlikka erishilganiga va yaqin oylarda jang maydonidagi vaziyat tubdan o‘zgarishiga ishonmoqda, deb xabar berdi nytimes.com.

Putin Ukraina mudofaasi yaqinda qulab tushishi mumkinligini taxmin qilmoqda. Kremlga yaqin manbalarning ta’kidlashicha, Rossiya armiyasi hujumlarini yanada kuchaytirgan va shu sharoitda Ukraina tomonidan keng ko‘lamli hujumlarsiz harbiy harakatlarni to‘xtatish haqida gap ham bo‘lishi mumkin emas. Bu fikr Moskvadagi hozirgi siyosiy muhitga mos keladi — Kreml hozir faqat g‘alaba haqida o‘ylayapti.

Boshqa tomondan, Donald Tramp so‘nggi kunlarda Putinning murosasiz va qattiqqo‘l pozitsiyasiga nisbatan ochiq norozilik bildiryapti. U, Rossiya yetakchisi “ko‘p va’da beradi, ammo natijada gaplar amalda aks etmaydi”, degan. Tramp fevraldan beri Putin bilan olti marta telefon orqali gaplashganini ta’kidlagan. Biroq, shu paytgacha Vashington Rossiyaga qarshi yangi sanksiyalar joriy etmadi, Ukrainaga katta harbiy yordam ko‘rsatmadi va Moskva talablarini rad etishda jiddiy qadam tashlamadi.

The New York Times suhbatdoshlaridan biriga ko‘ra, Putin Trampning sabri yakun topishi va yangi sanksiyalar kiritilishi mumkinligini yaxshi anglab turgan holda harakat qilmoqda. Shuningdek, Kreml hozircha G‘arb bilan muloqotda ehtiyotkorlik bilan qadam tashlayapti, chunki asosiy maqsad — Ukraina mudofaasini butunlay yo‘q qilish va Kiyevni muzokaraga majburlash.

Tramp esa, oxirgi chiqishlarida Putin pozitsiyasini tanqid qilib, “Rossiya yetakchisi so‘zda xushmuomala, ammo barchasi amaliy qadamlarga aylanmayapti”, degan. Shu bilan birga, u Rossiyaga qarshi yangi sanksiyalarni joriy etish masalasini “ko‘rib chiqayapman”, deya javob bergan.

Kremlda esa, Putin uzoq muddatli strategik maqsadlarni birinchi o‘ringa qo‘yayotgani aytiladi. Siyosiy tahlilchilar fikricha, Putin ehtimoliy sanksiyalar va yangi bosimlarga qaramasdan, G‘arb bilan aloqalarni o‘z maqsadlari yo‘lida tortishga tayyor. Shu bilan birga, kelajakdagi muzokaralarda sanksiyalarni yumshatish bo‘yicha kelishuv bo‘lishiga ham umid qiladi.

Ukrainadagi jangovar vaziyat esa har kuni o‘zgarib bormoqda. Rossiya armiyasi pozitsiyasidagi optimizm, G‘arbdagi shubhalar va Vashington-Moskva o‘rtasidagi munosabatlar xalqaro siyosiy sahnada yangi bosqichga ko‘tarildi.

Bu voqealar global siyosiy shaxmat o‘yinining yangi sahifasi bo‘lib qolmoqda. Oldinda qanday o‘zgarishlar bo‘lishini esa, vaqt ko‘rsatadi. Ammo ma’lumki, har bir so‘z va qaror Ukraina taqdirini belgilab berishi mumkin. “Zamin”ni Telegramʻda oʻqing!