Qozog‘iston Trampning 25 foizlik bojiga javob berdi

Qozog‘iston prezidenti Qosim-Jo‘mart To‘qayev Amerika rahbari Donald Trampning mamlakat tovarlariga boj soliqlari joriy etish to‘g‘risidagi qaroridan so‘ng, rasmiy javob yo‘lladi, deb ma’lum qildi Aqorda.

Prezident matbuot xizmati tarqatgan bayonotda ta’kidlanishicha, To‘qayev Qozog‘istonni AQSHning ko‘p yillik ishonchli savdo va investitsiyaviy hamkorlaridan biri sifatida qayd etib, ikki mamlakat o‘rtasidagi savdo munosabatlari shaffof, barqaror va o‘zaro manfaatli shaklda rivojlanishi zarurligini alohida ta’kidlagan.

Uning so‘zlariga ko‘ra, Qozog‘iston bu masalani kelishilgan va oqilona yechim bilan hal etish tarafdori. Shu maqsadda To‘qayev AQSH bilan ochiq va amaliy muloqotni davom ettirishga tayyor ekanini bildirgan. Davlat rahbari ikki davlat o‘rtasidagi savdo nizolarini murosaga asoslangan yondashuvlar orqali hal qilish mumkinligiga ishonchi borligini bildirgan.

Avvalroq, 7 iyul kuni AQSH prezidenti Tramp dunyodagi qator davlatlar yetakchilariga maktub yuborgani ma’lum bo‘lgan edi. Unda 1 avgustdan boshlab boj soliqlari keskin oshirilishi haqida xabar berilgan. Trampning xati Qozog‘iston yetakchisiga ham yuborilgan bo‘lib, unda mamlakat mahsulotlariga 25 foizlik qo‘shimcha tarif joriy etilishi tilga olingan.

Shundan so‘ng, Qozog‘iston Savdo vazirligi ushbu holat bo‘yicha Oq uyga aniq va asosli takliflar yo‘llaganini ma’lum qildi. Vazirlikning rasmiy vakilining ta’kidlashicha, joriy etiladigan yangi tariflar mamlakatning AQSHga yo‘naltiriladigan eksportining 95 foiziga ta’sir qilmaydi. Xususan, neft, uran, ferroqotishmalar, tantal, kumush va titan kabi asosiy eksport mahsulotlari bojlardan mustasno qilinadi.

Bu esa Qozog‘istonning tashqi iqtisodiy siyosatda muvozanatni saqlashga intiluvchi yo‘nalishini namoyon etmoqda. Mas’ullar aytishicha, ikki tomonlama munosabatlarda hech qanday qarama-qarshilik yuzaga kelmasligi va strategik sheriklik izchil davom etishi uchun diplomatik choralar ko‘riladi.

Mulohaza sifatida, xalqaro munosabatlar mutaxassislari bu jarayonni AQSHning umumiy boj siyosatini qayta ko‘rib chiqish jarayonining bir qismi deb baholamoqda. Qozog‘iston esa, o‘z navbatida, iqtisodiy manfaatlarini himoya qilishda muloqot yo‘lini tanlamoqda. “Zamin”ni Telegramʻda oʻqing!