Zelenskiy: AQSH qurol yetkazib berishni qayta boshladi

AQSH Ukrainaga qurol-yarog‘ yetkazib berishni qayta yo‘lga qo‘ydi. Bu haqda Ukraina prezidenti Volodimir Zelenskiy juma kuni xalqqa qilgan videomurojaatida ma’lum qildi. Unga ko‘ra, Amerika Qo‘shma Shtatlari va Yevropa davlatlaridan ijobiy siyosiy signallar olingan.

"Bizda yuqori darajada aniq va kuchli siyosiy belgilar bor. Bu yaxshi signallar, ayniqsa AQSHdan va yevropalik do‘stlarimizdan kelayotgani quvonarli. Barcha ma’lumotlarga ko‘ra, qurol yetkazib berish qayta boshlangan", – dedi Zelenskiy o‘z murojaatida.

Biroq Ukraina rahbari qaysi turdagi qurol tizimlari yetkazib berilayotganiga oydinlik kiritmadi. Faqatgina Yevropa davlatlari tomonidan yangi mudofaa yordam paketlari tayyorlanayotganini alohida ta’kidladi. Ushbu qadamlar Kiyev uchun g‘oyat muhim ahamiyat kasb etadi, chunki frontdagi vaziyat jiddiy va aniq mudofaa yordami Ukraina armiyasining imkoniyatlarini mustahkamlaydi.

"Keyingi haftada Amerika tomoni bilan harbiy miqyosda ishlashni davom ettiramiz. Xususan, general Kellog bilan harbiylarimiz. Shuningdek, yangi Yevropa mudofaa paketlarini tayyorlayapmiz", - deya qo‘shimcha qildi Ukraina prezidenti.

Ma’lumot o‘rnida, 1 iyul kuni Politico nashri AQSH Oq uyiga tayanib, Pentagon Ukrainaga Patriot zenit tizimlari uchun raketalar va boshqa yuqori aniqlikdagi o‘q-dorilarni yetkazib berishni vaqtincha to‘xtatgani haqida xabar qilgan edi. Bu qaror, xabarga ko‘ra, AQSHning o‘z zaxiralari juda kamayib ketgani tufayli qabul qilingan.

Bundan tashqari, CBS telekanali ma’lum qilishicha, nafaqat Ukraina, balki boshqa davlatlarga ham qurol yetkazib berish bo‘yicha vaqtincha cheklovlar joriy qilingan. Bu Pentagon tomonidan olib borilayotgan keng ko‘lamli inventarizatsiya va xavfsizlik tekshiruvining bir qismi sifatida baholanmoqda.

Zelenskiyning yangi bayonoti ortidan, AQSH va Yevropa mamlakatlarining Kiyevga nisbatan harbiy yordamini yanada kengaytirishga tayyor ekanligi yana bir bor namoyon bo‘ldi. Xususan, keyingi haftalarda Ukrainaga yangi harbiy yordam paketlari, xususan, zenit tizimlari, artilleriya snaryadlari va aniq zarba uyushtirishga qodir qurollar yetkazilishi kutilmoqda.

Bu jarayon Rossiya bilan keskinlashgan munosabatlar fonida Ukraina uchun strategik ahamiyatga ega. Zelenskiyning ta’kidlashicha, G‘arbdan kelayotgan har qanday yordam mamlakat mudofaasi va suvereniteti uchun katta tayanchdir. Mudofaa imkoniyatlari yanada oshishi uchun Kiyev bugun har bir so‘z va harakatni jiddiy baholamoqda. “Zamin”ni Telegramʻda oʻqing!