Telegram'ni obro‘sizlantirish harakatidan kim manfaatdor?

Telegram messenjeri atrofidagi muhokamalar yana qiziy boshladi. Bu gal gap shunchaki yangilik emas — balki obro‘ga putur yetkazish urinishlari haqida ketmoqda. Messenjer asoschisi Pavel Durov bu masalada ochiq va qat’iy bayonot bilan chiqdi.

Uning fikricha, so‘nggi paytlarda OAVlarda paydo bo‘layotgan xabarlar tasodif emas, balki ma’lum maqsadga xizmat qilayotgan harakatlar natijasidir. Gap 17 iyul, payshanba kuni paydo bo‘lgan va Telegram Rossiyada ofis ochishga tayyorlanayotgani haqidagi xabarlar haqida bormoqda.

Hi-Tech Mail internet-nashrida paydo bo‘lgan maqolaga ko‘ra, Roskomnadzor saytida Telegram Messenger Inc. kompaniyasi Rossiyada filial yoki vakolatxona ochish yoki yuridik shaxs sifatida ro‘yxatdan o‘tish bo‘yicha «tasdiqlash bosqichida» ekani aks etgan.

Biroq Pavel Durov ushbu xabarlarga shubha bilan qaramoqda. U o‘zining shaxsiy Telegram-kanalida bu holatni avval ham kuzatilgan bosimlar va kampaniyalarning davomi sifatida baholadi. Uning ta’kidlashicha, Telegram'ni obro‘sizlantirish bo‘yicha maqsadli harakatlar ketmoqda va buni faqat «jurnalistik xatolar» bilan izohlab bo‘lmaydi.

Durov bu haqda shunday deydi:
«Ehtimol, biz jurnalistlarning zararsiz xatolari bilan emas, balki Telegram'ni obro‘sizlantirish bo‘yicha maqsadli kampaniya bilan shug‘ullanayotganlar ishini ko‘rayotgandirmiz».

Ayni vaqtda, Telegram tomonidan Rossiyada rasman ofis ochish yoki yuridik maqomga ega bo‘lish haqida hech qanday rasmiy bayonot berilgani yo‘q. Bu esa vaziyatning aniqligiga oid savollarni yanada oshirmoqda.

Nima bo‘lganda ham, Pavel Durov so‘nggi bayonoti orqali messenjer atrofidagi muammolarga nisbatan pozitsiyasini yaqqol bildiradi. Telegram nafaqat texnologiya, balki erkinlik va mustaqillik ramzi sifatida ham kurash markazida qolmoqda.

Oldinda yana qanday voqealar bo‘lishi noma’lum. Ammo aniq bir narsa bor — Telegram atrofidagi kurash endi boshlanganga o‘xshaydi. “Zamin”ni Telegramʻda oʻqing!