Sankt-Peterburg hukumati chet el fuqarolarining shahar hududida taksi haydovchisi sifatida ish faoliyatini 2025 yil oxirigacha cheklashga qaror qildi. Bu haqda “Meduza” nashri shahar ma’muriyati ma’lumotlariga tayanik xabar tarqatdi. Rasmiylar bunday cheklov Rossiya fuqarolari uchun yangi ish imkoniyatlarini yaratish va transport xizmatlarida xavfsizlikni oshirish maqsadida joriy etilganini ta’kidlamoqda.
Ma’lumotlarga ko‘ra, Sankt-Peterburg gubernatori Aleksandr Beglov maxsus farmon imzolagan. Unga binoan, patent asosida ishlayotgan chet el fuqarolari “yengil taksi va haydovchisi bo‘lgan ijaraga olingan yengil avtomobillar” sohasida ishlash huquqidan mahrum qilinadi. Bu qaror 2025 yil oxiriga qadar amal qiladi. Ya’ni, kelgusi bir yarim yil davomida shaharda faqat Rossiya fuqarolarigina taksida ishlash huquqiga ega bo‘ladi.
Ushbu yangi tartib joriy etilishi munosabati bilan, hozirda migrant haydovchilarni ishga jalb qilgan taksi kompaniyalariga uch oylik o‘tish davri berildi. Bu muddat ichida ular mavjud mehnat shartnomalarini tugatishi va yangi, mahalliy haydovchilarni yollashi kerak bo‘ladi. Qaror 2025 yil 7 avgustdan rasman kuchga kiradi.
Shahar ma’muriyatining bayonotida ta’kidlanishicha, taqiq taksi xizmatlarining sifati va xavfsizligini yaxshilash, shuningdek, mahalliy aholi uchun ish o‘rinlari yaratish maqsadida qabul qilingan. Shu orqali, shahardagi iqtisodiy va ijtimoiy barqarorlikni saqlashga ham e’tibor qaratiladi.
Rasmiylar mazkur cheklov chorasi orqali 2025 yil yakunigacha uning ijtimoiy-iqtisodiy samarasini tahlil qilishni va 2026 yildan keyin ham ushbu yo‘nalishda choralar ko‘rish lozimligini aniqlashni maqsad qilgan. Qayd etilishicha, bu qaror bir necha oy davomida muhokama qilingan va dastlab, 2025 yil 1 iyuldan chet elliklarga kuryerlik faoliyatini ham taqiqlash rejalashtirilgan edi.
Aytish joizki, bu Rossiyada migrantlar faoliyatini cheklash bo‘yicha birinchi holat emas. 2015 yildan buyon mamlakatning bir qator hududlarida chet ellik ishchilar uchun turli cheklovlar joriy qilingan. Jumladan, so‘nggi yil ichida Tatariston, Kamchatka va Omsk viloyatlarida ham migrantlarning taksi sohasida ishlashini taqiqlash holatlari qayd etilgan.
Zamin.uz tahririyati bu masala bo‘yicha yangi ma’lumotlarni doimiy ravishda yoritib boradi. Bizni kuzatib boring.
“Zamin”ni Telegramʻda oʻqing!
