G‘azo Sog‘liqni saqlash vazirligining ma’lumotlariga ko‘ra, so‘nggi 24 soat ichida G‘azo sektorida kamida yetti kishi ocharchilik tufayli vafot etdi. Bu bilan 2023 yilda boshlangan Isroil-Hamas mojarosidan beri ochlikdan halok bo‘lganlar soni 154 nafarga yetdi, ularning 89 nafari bolalar ekani ta’kidlandi.
BMT tomonidan qo‘llab-quvvatlanadigan global oziq-ovqat xavfsizligi ekspertlari G‘azodagi vaziyatni "eng og‘ir ssenariy" sifatida baholab, ochlik xavfi allaqachon haqiqatga aylanayotganini ogohlantirmoqda.
Isroil tomoni G‘azoga gumanitar yordam kirishiga to‘sqinlik qilmayotganini bildirmoqda, biroq bu da’volar BMT, Yevropa Ittifoqi va boshqa xalqaro tashkilotlar tomonidan shubha ostiga olinmoqda.
Chorshanba kuni ertalab G‘azoning janubidagi Rafiya hududida joylashgan Gumanitar Yordam Jamg‘armasi (GHF) tarqatish markazi yaqinida olti nafar falastinlik halok bo‘ldi, deb xabar berdi G‘azo shifoxona manbalari. Ular olomon yordam markazi ochilishidan oldin kirishga uringanida, Isroil tanki tomonidan nishonga olingani aytilmoqda.
Biroq GHF bu hududda halok bo‘lganlar yo‘qligini bildirgan. Isroil Mudofaa Kuchlari (IDF) esa "guruhlanib turgan shubhali shaxslar" o‘z qo‘shinlariga tahdid solgani bois, ular uzoq masofadan ogohlantiruvchi o‘q uzganini ta’kidladi. IDFning dastlabki tekshiruvlari bo‘yicha, xabar qilingan qurbonlar soni Isroil rasmiylari qo‘lidagi ma’lumotlarga mos kelmaydi.
Sog‘liqni saqlash vazirligi esa chorshanba kuni 103 kishi halok bo‘lganini, ularning 60 nafari yordam izlab o‘lganini bildirdi. Falastin Qizil Yarim Oy Jamiyati esa Zikim hududida yordam kutayotgan fuqarolarga tegishli voqeada ikki kasalxonaga olti jasad keltirilganini va 274 kishi jarohat olganini ma’lum qildi.
Seshanba kuni G‘azoga atigi 109 ta yuk mashinasi yordam olib kirilgan. Biroq, ularning ko‘pchiligi manzilga yetmasdan talon-taroj qilingan. Un ortilgan mashinalar yordamga muhtoj fuqarolar tomonidan qurshab olinib, ba’zilari oziq-ovqatni o‘z ehtiyoji uchun olgan bo‘lsa, boshqalari uni bozorda sotish maqsadida egallagan.
BMT hisob-kitoblariga ko‘ra, G‘azodagi gumanitar inqirozni yumshatish uchun har kuni kamida 600 ta yordam mashinasi zarur.
Isroil mart oyida yordam oqimini to‘liq to‘xtatgan edi. Bu harakat ikki oyga cho‘zilgan o‘t ochishni to‘xtatish kelishuvining tugashiga va harbiy harakatlarning qayta boshlanishiga olib keldi. Isroil bu orqali Hamasdan qolgan garovdagilarni ozod qilishga bosim o‘tkazishni maqsad qilgan edi.
Gumanitar bosim va xalqaro ogohlantirishlardan so‘ng, blokada qisman yumshatildi, ammo oziq-ovqat, dori-darmon va yoqilg‘i tanqisligi tobora kuchaymoqda.
“Zamin”ni Telegramʻda oʻqing!
