Texasda siyosiy inqiroz: gubernator demokratlarni lavozimdan bo‘shatmoqchi

Texas gubernatori Greg Abbott saylov chegaralarini respublikachilar foydasiga o‘zgartirish rejasini to‘xtatmoqchi bo‘lgan demokrat qonunchilarni lavozimdan bo‘shatish uchun Oliy sudga da’vo arizasi topshirdi. U ayniqsa, Demokratik partiya yetakchilaridan biri Jin Vu ustidan “hukumatni egallashga urinish” aybi bilan da’vo qildi.

Abbottning aytishicha, 50 dan ortiq demokratlarning shtatdan chiqib ketishi va sessiyaga qaytishdan bosh tortishi ularning o‘z vazifasini tark etganini bildiradi va bu ularni ishdan bo‘shatishga asos bo‘la oladi.

Masala sudda “quo warranto” — ya’ni mansabdor shaxsning lavozimga qonuniy ravishda egalik qilayotganini aniqlovchi kamdan-kam ishlatiladigan qonuniy vosita orqali ko‘rib chiqilmoqda. Bu ariza qonunchilarni, xususan Jin Vuni lavozimidan chetlatish talabini o‘z ichiga oladi. Respublika tarafdorlari bu orqali sessiyani davom ettirib, saylov chegaralarini o‘zgartirishni istamoqda.

Jin Vu esa bu harakatni konstitutsiyaviy huquqlarni buzish deb baholab, o‘zining sessiyada qatnashmayotgani siyosiy norozilik va qonunni himoya qilish ekanini ta’kidlamoqda.

Ayni paytda Texas Oliy sudi ishni ko‘rib chiqmoqda va qaror juma kungi sessiyadan oldin e’lon qilinishi kutilmoqda. Qayd etilishicha, barcha 9 sudya respublikachilar partiyasidan bo‘lib, bosh sudya esa ilgari Abbottning yuridik maslahatchisi bo‘lgan. Bu esa sud qarori siyosiy jihatdan biryoqlama bo‘lishi mumkinligi haqida savollar tug‘dirmoqda.