Isroil bosh vazirining G‘azoni to‘liq egallash rejasi ichki va xalqaro bahslarni kuchaytirmoqda

Isroil bosh vaziri Benyamin Netanyahu G‘azo sektorida keng qamrovli hujum rejasini e’lon qildi. U “XAMAS”ni hokimiyatdan chetlatish va hududni vaqtincha nazoratga olib, keyinchalik arab kuchlariga topshirishni maqsad qilganini aytdi. Netanyahu hududni uzoq muddat boshqarish niyati yo‘qligini bildirdi.

Hujum G‘azo shahri va markaziy lagerlarga qaratilishi mumkin. Bu yerda taxminan bir million falastinlik va asirlarning bir qismi bor. Operatsiya bir necha oy davom etib, aholining majburiy ko‘chirilishi va gumanitar inqirozning chuqurlashishiga olib kelishi ehtimoli katta. Armiya bosh shtabi rahbari Eyol Zamir bu rejani “tuzoq” deb atadi.

Asirlar oilalari ham xavotirda. Ular asirlarni faqat muzokaralar orqali ozod qilish mumkin, deb hisoblaydi. Mahalliy matbuot hujum davomida tirik asirlar halok bo‘lishi mumkinligini yozmoqda. So‘rovlar ko‘pchilik isroilliklar kelishuv tarafdori ekanini ko‘rsatmoqda.

Reja xalqaro hamkorlar o‘rtasida ham kelishmovchilik keltirdi. Buyuk Britaniya elchisi Simon Uolter bu qarorni “katta xato” deb atadi. AQSh elchisi Mayk Xakkabi esa qaror Isroilga tegishli masala ekanini bildirdi. Netanyahu urushdan keyingi G‘azo bo‘yicha aniq reja taqdim etmagan.