Siyosiy maydonda jiddiy harakatlar kuzatilayotgan bir vaqtda, Falastin milliy ma’muriyati o‘z taqdiri uchun yangi tarixiy sahifani yozishga tayyorgarlik ko‘rmoqda. Xususan, sentyabr oyida Nyu-York shahrida bo‘lib o‘tadigan BMT Bosh assambleyasining navbatdagi yig‘ilishida Falastin muxtoriyati rasman Falastin davlati maqomini olishi mumkinligi haqida jiddiy mulohazalar ilgari surilmoqda. Bu haqda Al Araby Al Jadeed nashri o‘z manbasiga tayanib ma’lum qildi.
Manbaning aytishicha, Falastin rahbariyati bu muhim qadamni prezident Mahmud Abbosning shaxsan BMT minbaridan turib bir tomonlama e’lon qilishi imkoniyatini ko‘rib chiqmoqda. Bu qaror qabul qilinsa, mintaqa va xalqaro siyosatda yangi voqealar zanjiri boshlanishi tabiiy.
Shu bilan birga, rasmiy qarordan oldin Abbos konstitutsiyaviy bayonot berishi va unda davlatning asosiy qonunchilik poydevori, chegaralari hamda boshqaruv tizimi aniq belgilanishi kutilmoqda. Shuningdek, Falastin milliy kengashi saylovlarining aniq sanasi ham e’lon qilinishi shart. Manbaning ta’kidlashicha, “konstitutsiyaviy bayonot prezident tomonidan imzolanadi va davlatning chegaralari hamda qonuniy asoslari rasmiylashtiriladi”.
Aslida, muxtoriyatni to‘liq davlat maqomiga o‘tkazish g‘oyasi ilk bor 2015 yilda kun tartibiga kiritilgan, ammo o‘shanda bu masala prezident tomonidan izohsiz qoldirilib, muzlatib qo‘yilgandi.
Yaqinda esa xalqaro maydonda Falastinni tan olish imkoniyatiga munosabat yana faollasha boshladi. Iyul oyining oxirlarida 15 mamlakat tashqi ishlar vazirlari bunday tashabbusni qo‘llab-quvvatladi. Ularning orasida Avstraliya, Andorra, Irlandiya, Islandiya, Ispaniya, Kanada, Luksemburg, Malta, Yangi Zelandiya, Norvegiya, Portugaliya, San-Marino, Sloveniya, Finlyandiya va Fransiya kabi davlatlar bor.
Shubhasiz, agar sentyabrda BMTda mazkur bayonot e’lon qilinsa, Falastinning xalqaro nufuzi sezilarli darajada oshishi va mintaqa geosiyosiy muhitida yangi sahifa ochilishi mumkin. Bu esa yaqin yillarda ko‘p yillik tortishuv va muzokaralarga yangi turtki berishi ehtimoldan xoli emas.
