Joriy yil boshidan beri Telegram messenjerida qoidalarni buzgan, turli turdagi noqonuniy yoki zararli kontent tarqatgan kanal va guruhlarga qarshi katta ko‘lamda choralar ko‘rildi. Messenjer rasmiy ma’lumotiga ko‘ra, 2025 yilning birinchi yetti oyi davomida platforma jami 20,9 milliondan ziyod kanal va guruhlarni bloklagan.
Platforma saytida aytilishicha, yopilgan kanallarning aniq sabablari ro‘yxat qilinmagan bo‘lsa-da, odatda bunday choralar spam tarqatish, firibgarlik sxemalari yoki axloq me’yorlariga zid kontent joylashtirish holatlarida qo‘llaniladi. Shu tariqa Telegram o‘z maydonini xavfli va zararli faoliyatdan tozalash maqsadida muntazam ravishda monitoring olib boradi.
Telegram asoschisi Pavel Durov ham bunga alohida e’tibor qaratgan. Uning aytishicha, so‘nggi paytlarda ayrim kanallar tovlamachilik, shantaj yoki haq evaziga yolg‘on ma’lumot tarqatish bilan shug‘ullanayotgani aniqlangan. Shuning uchun platforma bunday kanallarni aniqlab, ularni qisqa vaqt ichida o‘chirib tashlash siyosatiga o‘tgan.
Faqatgina 2025 yil 27 iyul kunining o‘zidayoq, messenjer ma’muriyati tomonidan 402 mingdan ortiq kanal va guruhlar yopilgan. Bu ko‘rsatkich Telegram'ning global miqyosdagi keng qamrovli nazorati va interaktiv muhitni sof saqlashga qaratilgan qat’iy choralaridan dalolat beradi.
Mutaxassislar ta’kidlashicha, bunday katta ko‘lamdagi blokirovkalar platformani toza saqlash bilan birga, oddiy foydalanuvchilar xavfsizligini ta’minlaydi. Shu bilan birga, ayrim hollarda adolatli kanallar ham yopilib qolishi mumkinligi, bu esa messenjer tomonidan qayta ko‘rib chiqish jarayonida hal etiladi.
Telegram'ning bu qat’iy siyosati internetdagi axborot maydonini nazorat qilish va zararli kontentga qarshi samarali kurashishda muhim qadam sifatida baholanmoqda. Platformada faoliyat yurituvchi millionlab kanallar uchun bu holat qoidalarga amal qilishning qanchalik zarur ekanini yana bir bor yodga soldi.
“Zamin”ni Telegramʻda oʻqing!
