Alyaskada bo‘lib o‘tgan Donald Tramp va Vladimir Putin uchrashuvi xalqaro ommaviy axborot vositalarida katta muhokamalarga sabab bo‘ldi. Jurnalistlar Amerika prezidentining qarsaklari, qizil yo‘lak, prezident limuzinidagi birgalikda harakat va Oq uy rahbaridan kutilmagan sukutni qayd etishdi. Shu bilan birga, Yevropa nashrlari Rossiya rahbarining bunday dabdaba bilan kutib olinishiga tanqidiy munosabat bildirdi.
The New York Times: Olqishlar va ingliz tili
NYT yozishicha, Rossiya yetakchisining tashrifiga maksimal darajada rasmiy va tantanali ruh berildi: harbiy aviaparad, qizil yo‘lak, rasmiy qo‘l siqish va prezident limuzinidagi safar. Tramp Putinni qarsaklar bilan kutib oldi. Nashr shuni ham qayd etdiki, Putin ingliz tilida bemalol muloqot qildi va uning yonida tarjimon yo‘q edi.
«Aftidan, tarjimonlar hech qayerda ko‘rinmadi, Putin esa ingliz tilida muloqot qilish uchun yetarlicha erkin gapirdi. Bu ikki yetakchi orasidagi suhbatlarga alohida maxfiylik qo‘shishi mumkin».
CNN: Sukunatli Tramp va Yevropa e’tirozi
CNN ta’kidlashicha, muzokaralar boshida Tramp kamdan-kam hollarda uchraydigan holatda bayonotsiz sukut saqladi.
«Elmendorf-Richardson qo‘shma bazasida ikki yetakchi sukut bilan o‘tirib, vaziyatni kuzatdi. Hech biri kirish so‘zini aytmadi».
Telekanal Yevropa yetakchilari Putinga bunday tantanali munosabat ko‘rsatilishini og‘ir qabul qilganini qayd etdi. Shu bilan birga, CNN ularning «tana tili»ga e’tibor qaratdi va sammit muhitini sovuqlikdan yiroq deb baholadi.
Reuters: Eski tanishlardek iliq muhit
Agentlik uchrashuv muhitini iliq, go‘yo ikki yetakchi ko‘p yillik do‘stlardek tasvirladi.
«Tramp va Putin bir-birini qadrdon do‘stlardek qarshi oldi. Ikkalasi qo‘l siqib, samimiy munosabat namoyon etdi».
NBC: Putinning tanlovi va Zelenskiy bilan farq
NBC yozishicha, uchrashuvdan so‘ng Putin o‘z Aurus avtomobiliga o‘tirish o‘rniga Trampning Cadillac limuzinini tanladi.
«Uchish-qo‘nish yo‘lagida uning shaxsiy avtomobili turgan bo‘lsa-da, Rossiya yetakchisi Tramp limuzinini afzal ko‘rdi».
Telekanal, shuningdek, Trampning Putinga samimiy munosabati bilan Zelenskiyga fevralda ko‘rsatgan keskin munosabati o‘rtasidagi katta farqni ta’kidladi.
Bloomberg: Xavfsizlik uchun sinov va diplomatik uslublar
Bloomberg uchrashuv tafsilotlarini yoritib, bu AQSH maxsus xizmatlari uchun katta sinov bo‘lganini qayd etdi.
«Tramp o‘zining qizil galstukida birinchi bo‘lib pastga tushdi. Putin qadamlarini ishonch bilan tashlab, tabassum bilan qo‘l siqdi. Tramp esa qarsak bilan qarshi oldi. Keyin Putin Amerika prezidentining zirhli limuziniga o‘tirdi. Bu kuch tuzilmalari uchun haqiqiy imtihon bo‘ldi».
Agentlik ta’kidlaganidek, bu uchrashuv turli diplomatik uslublarning to‘qnashuvini ko‘rsatdi: Putin — strategik sabr va nazorat tarafdori, Tramp esa tezkor g‘alabalar va shaxsiy manfaatlarga urg‘u beradi.
Sky News va Bild: Sanksiyalar o‘rniga qizil gilam
Sky News sammitni Putin uchun «mukofot» sifatida talqin qildi.
«Quvg‘indi ko‘proq sherikka o‘xshayapti. Donald Tramp sanksiyalar o‘rniga Rossiya yetakchisini davlat tashrifiga teng darajada qabul qildi».
Germaniyaning Bild nashri esa Amerika prezidentni Putinni olqishlagani va uning sharafiga qizil gilam to‘shalgani uchun tanqid qildi.
The Guardian: Har ikki tomon uchun foyda
Britaniya nashri yozishicha, sammit har ikki yetakchi uchun ham yutuqsiz yakunlanmadi. Putin AQSH prezidenti bilan uning hududida uchrashish imkoniga ega bo‘ldi, Tramp esa media-shouda o‘zini global siyosatchi sifatida namoyon etdi.
«Uchrashuv har ikkisi uchun ham g‘alabaga teng bo‘lishi mumkin. Putin Amerika zaminida Tramp bilan uchrashdi, Tramp esa jahon sahnasida davlat arbobi sifatida namoyon bo‘ldi».
Xulosa
Alyaska sammiti natijalariga turli qarashlar bildirildi. Amerika matbuoti munosabatlarni samimiy deb baholasa, Yevropa ommaviy axborot vositalari Putinning tantanali qabul qilinishiga shubha bilan qaradi. Biroq umumiy xulosa aniq: Tramp va Putinning uchrashuvi dunyo siyosiy sahnasida katta bahs va qiziqish uyg‘otdi.
