Isroil G‘azo shahriga hujumlarni kuchaytirmoqda

Isroil samolyotlari va tanklari G‘azo shahrining shimoliy va sharqiy hududlarini bombardimon qilmoqda. Hujumlar deyarli bir million aholiga ega bo‘lgan G‘azo shahrini egallashga qaratilgani aytilmoqda.

Hamas boshqaruvidagi sog‘liqni saqlash vazirligi xabariga ko‘ra, so‘nggi 24 soatda 64 kishi halok bo‘lgan va qariyb 300 kishi yaralangan. Umumiy hisobda, 2023 yil 7 oktyabrdan buyon G‘azoda 62 mingdan ortiq odam halok bo‘lib, 157 mingdan ortig‘i jarohat olgan.

Isroil bosh vaziri Benyamin Netanyaxu xalqaro bosimlarga qaramay Hamasni butunlay tor-mor qilishini ta’kidladi. Mamlakat hukumati 60 mingdan ortiq zaxira askarini safarbar etmoqda. Mudofaa vaziri esa Hamas qurolsizlanib, asirlarni ozod qilmasa, G‘azo shahri butunlay vayron qilinishini ma’lum qildi.

Qatar va Misr vositachiligida sulh muzokaralari davom etmoqda. Hamas 60 kunlik sulh va ayrim asirlarni ozod qilishni nazarda tutgan taklifni qabul qilganini bildirdi. Biroq Isroil bunday qisman kelishuvni rad etib, barcha asirlar ozod qilinishini talab qilmoqda.

BMT va xalqaro tashkilotlar G‘azo shahriga hujum og‘ir gumanitar oqibatlarga olib kelishi mumkinligini ogohlantirmoqda. Rasmiy ma’lumotlarga ko‘ra, uylarning 90 foizi vayron bo‘lgan, sog‘liqni saqlash va suv-ta’minoti tizimlari deyarli ishlamayapti. Juma kuni BMT G‘azo shahrida ocharchilik yuzaga kelganini tasdiqladi.