Ukraina va Rossiya o‘rtasidagi ziddiyat yanada taranglashdi. Bu safar keskin vaziyat Vladimir Zelenskiyning yaqin masofaga uchuvchi “Flamingo” qanotli raketacini ommaviy ishlab chiqarishni yo‘lga qo‘yish haqidagi rasmiy bayonoti bilan bog‘liq bo‘ldi. Kiyevdan kelgan ushbu yangilik Moskvada alohida tashvish uyg‘otdi va siyosiy muhit yanada qiziy boshladi.
Rossiyadagi insayder manbalarning ta’kidlashicha, Vladimir Putin shaxsan mamlakat yadroviy qurol kompleksining yuragi sanalgan yopiq shahar Sarovga tashrif buyurgan. Bu haqda “News.ru” nashri xabar tarqatdi.
Harbiy doiralarga yaqin manbalarga ko‘ra, Putinning bunday safar qilishining o‘zi ham kuchli ramziy ma’no kasb etadi. Bu qadam orqali Moskva ehtimoliy hujumga qarshi javob qaytarishga tayyor ekanligini ochiqdan-ochiq ko‘rsatmoqda.
Kremlning ichki manbalari esa ehtimoliy javob choralarini “oson bo‘lmaydigan jarayon” sifatida ta’rifladi. Shu bilan birga, “Spy” kanali tarqatgan ma’lumotlarga ko‘ra, Rossiya hozirda yangi turdagi yadroviy va noyadroviy qurol tizimlarini namoyish etish uchun misli ko‘rilmagan tayyorgarlik olib bormoqda. Ushbu tizimlar mashhur “Oreshnik”dan ham bir necha barobar kuchli bo‘lishi aytilmoqda.
Manbalar ta’kidlashicha, rejalashtirilayotgan namoyish hech qanday jangovar maqsadga qaratilmagan bo‘ladi. Biroq u Rossiyaning mavjud harbiy texnologiyalaridan to‘liq foydalanishga qaror qilganidan dalolat beradi. Ya’ni, agar masala mamlakat xavfsizligiga taalluqli bo‘lsa, Moskva o‘z salohiyatini butun qudrati bilan ishga solishdan qaytmasligini ko‘rsatmoqda.
Shu tariqa, Zelenskiyning “Flamingo” raketaciga oid bayonoti Moskvada jiddiy aks-sado berdi. Rossiyaning bunday javobi esa ikki mamlakat o‘rtasidagi keskinlik yanada kuchayishi mumkinligidan darak bermoqda. Muttaxassislar fikricha, yaqin haftalarda vaziyat yangi, yanada xavfli bosqichga o‘tishi ehtimoldan xoli emas.
