Amerikalik Liza Fayrmen dunyodagi eng yirik boshqotirmalar kolleksiyasi sohibasi sifatida Ginnes rekordlar kitobiga kiritildi. Bu haqda tashkilot rasmiy sayti ma’lum qildi.
Avvalgi rekord 2023 yilda AQShlik Jon Uolchak tomonidan qayd etilgan bo‘lib, u 2000 ta jumboq to‘plagan edi. Liza esa bu natijani deyarli ikki baravar oshirdi — uning jamg‘armasida 4060 ta turli jumboqlar mavjud.
Qiz boshqotirmalarga 2019 yilda mehr qo‘ya boshlagan. Shu davrdan beri u Ravensburger Puzzles ishlab chiqaruvchisining mahsulotlarini tanlaydi. Kolleksiyada Rojdestvo manzaralari, Disney qahramonlari, “Do‘stlar” seriali, Jeyms Bond filmlari va mashhur “Salom Kitti”ga bag‘ishlangan 123 ta turkumli jumboqlar ham bor.
Lizaning ayrim buyumlari juda noyob. Masalan, u "Yulduzli urushlar"dagi Yoda tasvirlangan jumboqni topish uchun yetti yil sarflagan.
Havasdan tashqari, u boshqotirma musobaqalarida ham qatnashadi. Shu paytgacha uch bor milliy chempionatda, bir marta esa jahon chempionatida ishtirok etgan. Ammo Liza bellashuvlardan keyin ko‘p hollarda o‘zini “charchagan” his qilishini tan oladi:
— Musobaqalar men uchun biroz qiyin, shuning uchun ko‘proq juftlik yoki jamoaviy ishtirok etishni afzal ko‘raman. Lekin bu tadbirlar orqali boshqa jumboq ixlosmandlari bilan tanishish, do‘stlar orttirish va san’atkorlar bilan uchrashish menga juda yoqadi, — deydi u.
Qizning so‘zlariga ko‘ra, u hech qachon rekord o‘rnatishni niyat qilmagan:
— Men uchun bu oddiygina sevimli mashg‘ulot edi. Boshqotirmalarga qiziqish asta-sekin katta ishtiyoqqa aylandi, xolos, — deydi rekordchi.
Shu tariqa, Liza Fayrmenning kolleksiyasi nafaqat AQSh, balki butun dunyo miqyosida eng yirik boshqotirma jamg‘armasiga aylandi.
Manba: Pravilamag
“Zamin”ni Telegramʻda oʻqing!
