Yer chanqadi: yomg‘irsiz mavsum fermerlarni qiynamoqda

Sharqiy Angliya so‘nggi yillarda eng qurg‘oqchil mavsumni boshdan kechirmoqda. Anglian Water kompaniyasi ma’lumotiga ko‘ra, fevraldan iyulgacha atigi 165 millimetr yomg‘ir yog‘gan. Bu 1899-yildan buyon uchinchi eng quruq davr bo‘ldi. Mutaxassislar bu holat suv tanqisligini kuchaytirayotganini ta’kidlashmoqda.

Kompaniya mijozlarni suvdan tejamkor foydalanishga chaqirmoqda. Hozircha Sharqiy Angliyada bog‘larni sug‘orish uchun suvdan foydalanishga cheklov qo‘yilmagan. Ammo ekspertlar suv tanqisligiga e’tibor qaratish uchun bunday choralar kerakligini aytmoqda.

Mutaxassislar faqat uzoq davom etadigan yomg‘irgina tabiatni tiklashga yordam berishini aytishmoqda. Ularning fikricha, iqlim o‘zgarishi sababli suv zaxiralari tobora xavf ostida qolmoqda.

Avgust oyining dastlabki yigirma kunida Sharqiy Angliyaga atigi 10 millimetr yomg‘ir yog‘di. Oddiy sharoitda bu davrda o‘rtacha 60 millimetr yog‘in bo‘lishi kerak edi. Meteorologlar yozda kutilgan yomg‘irning atigi 53 foizi yog‘ganini ma’lum qildi.

Anglian Water kompaniyasi aholiga mashinalarni yuvishni vaqtincha to‘xtatish va hovli hamda bog‘larni sug‘orishda ehtiyotkor bo‘lishni maslahat bermoqda. Kompaniya suvdan oqilona foydalanish kelajak uchun muhimligini eslatib, imkon qadar ko‘proq suvni tabiatda qoldirish zarurligini ta’kidlamoqda.