Ukrainaning milliy xavfsizlik va mudofaa kengashi sobiq kotibi hamda Oliy Rada sobiq raisi Andrey Parubiy otib o‘ldirilgani haqida "Obshchestvennoye" telekanali o‘zining Telegram-kanali orqali ma’lum qildi.
Telekanal tarqatgan axborotda quyidagicha deyiladi:
— Politsiya Lvov shahrida siyosiy arbob otib o‘ldirilgani haqida ma’lum qildi. Gap Andrey Parubiy haqida bormoqda.
Avvalroq Ukraina politsiyasi Lvovda otishma oqibatida bir siyosiy jamoat arbobi halok bo‘lgani haqida xabar bergan, ammo o‘sha paytda shaxsning ism-sharifi oshkor etilmagan edi.
OAVning yozishicha, qotil «Glovo» yetkazib berish xizmatida kuryer sifatida ishlagan.
Ma’lumot uchun, Andrey Parubiy 2016–2019 yillarda Ukraina parlamenti — Oliy Radaga spikerlik qilgan. Shuningdek, 2014 yilda Ukraina milliy xavfsizlik va mudofaa kengashi kotibi sifatida ham faoliyat yuritgan.
Mutaxassislar bu voqeani Ukraina siyosiy hayotida katta shov-shuvli voqea sifatida baholashmoqda. Jamoatchilik esa qotillik sabablari va ortida turgan omillar yuzasidan rasmiy izohlarni kutmoqda.
