AQSh prezidenti Donald Tramp turli davlatlardan olib kiriladigan mahsulotlarga yuqori bojlar joriy qildi. U bu orqali Amerika iqtisodiyotini kuchaytirish va ish o‘rinlarini yaratishni maqsad qilganini aytmoqda. Mutaxassislar esa bu choralar eksportchilarni boshqa bozorlar, ayniqsa Xitoy tomon yo‘naltirayotganini ta’kidlashmoqda.
Braziliya dunyodagi eng yirik qahva ishlab chiqaruvchi mamlakat bo‘lsa-da, AQSh uning mahsulotlariga 50 foizlik boj qo‘ydi. Natijada braziliyalik kompaniyalar Xitoy bozoriga faol kirib bormoqda. Yuzlab firmalar allaqachon Xitoyga qahva eksporti uchun ro‘yxatdan o‘tgan.
Xuddi shuningdek, Hindistonning choy va dengiz mahsulotlari ishlab chiqaruvchilari ham AQSh bilan savdoda qiyinchiliklarga duch kelmoqda. Ular Xitoy va Yevropa bozorlarini muqobil yo‘nalish sifatida ko‘rib chiqmoqda. Mutaxassislar bu jarayon amerikalik xaridorlar uchun mahsulot narxlarining oshishiga olib kelishi mumkinligini aytmoqda.
Tahlilchilarning fikricha, Trampning boj siyosati oxir-oqibat amerikalik iste’molchilarga og‘irlik qiladi, eksportchilar esa Xitoy va boshqa yirik bozorlar bilan hamkorlikni kuchaytiradi.
