Yevropaning yirik davlatlari rahbarlari Ukraina prezidenti Volodimir Zelenskiy bilan o‘tkazilgan uchrashuvda Rossiya tomonidan yangi hujum ehtimoli haqida jiddiy xavotir bildirdi. Bloomberg agentligi tarqatgan ma’lumotlarga ko‘ra, o‘tgan hafta Fransiyaning Tulon shahrida bo‘lib o‘tgan Xavfsizlik kengashi yig‘ilishida Germaniya va Fransiya rasmiylari Donesk viloyati sharqidagi Pokrovsk yaqinida rus qo‘shinlari to‘planayotgani masalasini atroflicha muhokama qilgan.
Zelenskiyning o‘zi ham bir necha kun oldin Rossiya 100 mingga yaqin harbiy kuchini Pokrovsk tashqarisidagi front yo‘nalishiga yo‘naltirganini aytib o‘tgandi. Manbalarga ko‘ra, Moskva qo‘shinlari bir yildan ziyod vaqtdan buyon ushbu shaharni qamal qilishga va nazoratni qo‘lga olishga harakat qilib kelmoqda. «Pokrovskning egallanishi Rossiya uchun Kramatorsk hamda Slavyansk kabi yirik markazlarga yo‘l ochishi mumkin. Bu esa Kremlning butun Donesk viloyati ustidan to‘liq hukmronlik o‘rnatish maqsadi bilan uzviy bog‘liq», — deya ta’kidlaydi Bloomberg.
Maqolada qayd etilishicha, Rossiyaning yozda amalga oshirgan og‘ir va kuch sarflangan hujumlari Kreml kutgan darajada katta natija bermadi. Hozirga qadar Moskva qo‘shinlari sekinlik bilan olg‘a siljib, may va avgust oylari orasida bor-yo‘g‘i 2033 kvadrat kilometr hududni egallay olgan. Bu Ukraina umumiy maydonining atigi 0,3 foizini tashkil etadi.
Shu tariqa, Yevropa yetakchilari Kiyev bilan xavfsizlik kafolatlari yuzasidan fikr almashar ekan, frontdagi voqealar holati va Rossiyaning ehtimoliy qadamlari ularning asosiy tashvishiga aylanib qoldi.
“Zamin”ni Telegramʻda oʻqing!
