Germaniyaning Der Spiegel haftalik nashri va AFP axborot agentligi tarqatgan xabarlarga ko‘ra, Berlin hukumati Parijda o‘tadigan «ko‘ngillilar koalitsiyasi» yig‘ilishida Ukraina xavfsizligini ta’minlash borasidagi o‘z takliflarini taqdim etishi kerak edi. Ma’lumotlarga qaraganda, Germaniya kansleri Fridrix Mers videokonferensiya shaklida yig‘ilishda ishtirok etib, urushdan keyingi davr uchun Ukraina xavfsizligi bo‘yicha rejani muhokamaga qo‘yishi belgilangan.
AFP agentligi hukumatdagi manbalarga tayanib yozishicha, asosiy e’tibor Ukrainaning havo mudofaasi va hujumkor harbiy imkoniyatlarini kuchaytirishga qaratiladi. Shu bilan birga, Mersning takliflar paketida bundesver askarlarini Ukraina hududiga joylashtirish rejasi nazarda tutilmagani alohida ta’kidlangan.
Berlindagi suhbatdoshlar ma’lum qilishicha, Germaniyaning Ukraina xavfsizligini ta’minlashdagi ishtiroki uchun bir qator shartlar zarur. Jumladan, AQSH va Rossiyaning muzokaralarga tayyorligi, hukumat koalitsiyasi doirasida konsensusga erishish hamda Bundestagda qo‘llab-quvvatlanishi muhim hisoblanadi.
Der Spiegel nashri yozganidek, Germaniya hukumati tinchlik kelishuvi imzolangandan keyin Ukraina xavfsizligini ta’minlashda bundesver ishtirokini cheklash niyatida. Shu yo‘l bilan Berlin o‘z zimmasiga ortiqcha majburiyatlar olishdan qochishga harakat qilmoqda.
Shu tariqa, Parijdagi «ko‘ngillilar koalitsiyasi» yig‘ilishida Berlinning takliflari Kiyev xavfsizligi borasidagi eng muhim masalalardan biriga aylanishi kutilmoqda.
“Zamin”ni Telegramʻda oʻqing!
