Xitoy orbitaga Yaogan-40 masofaviy zondlash sun’iy yo‘ldoshlarining uchinchi guruhini muvaffaqiyatli olib chiqdi. Bu haqda Xitoy aerokosmik fan va texnologiya korporatsiyasi (CASC) ma’lum qilmoqda.
CASC xabar berishicha, uchirish jarayoni muvaffaqiyatli va mukammal amalga oshirilgan. Ma’lumotlarga ko‘ra, uchirish Pekin vaqti bilan 00:34 da shimoliy Shansi provinsiyasidagi Tayyuan kosmodromidan amalga oshirilgan. Ushbu sun’iy yo‘ldoshlar CZ-6A ("Chanchjen-6-ey") raketa tashuvchisi orqali orbitaga yetkazilgan. Bu Chanchjen seriyali raketalar uchun 593-uchirish bo‘lib hisoblanadi.
Yaogan-40 sun’iy yo‘ldoshlari asosan elektromagnit muhitni tadqiq qilish, atmosfera va kosmik muhitni o‘rganish hamda turli ilmiy tajribalarni amalga oshirish maqsadida mo‘ljallangan. Ularning orbitaga chiqishi Xitoyning kosmik texnologiyalar sohasidagi salohiyatini yana bir bor namoyish etdi.
Mavjud ma’lumotlarga ko‘ra, ushbu sun’iy yo‘ldoshlar orbitada barqaror harakat qilib, o‘z vazifalarini samarali bajarishi kutilmoqda. Ekspertlar fikricha, Yaogan-40 guruhi Xitoyning orbita tadqiqotlarini kengaytirish va elektromagnit muhitdagi tajribalarni rivojlantirishda muhim ahamiyat kasb etadi.
CASC mas’ullari bu uchirish Xitoyning ilmiy tadqiqotlar va zamonaviy aerokosmik texnologiyalar sohasidagi ustuvor yo‘nalishini ko‘rsatishi va kelajakdagi kosmik loyihalar uchun asos yaratishi haqida ta’kidlashgan.
“Zamin”ni Telegramʻda oʻqing!
