Buyuk Britaniya poytaxti Londonda immigratsiya siyosatiga qarshi ommaviy yurish – “Qirollikni birlashtiring” namoyishi bo‘lib o‘tdi. Politsiya ma’lumotlariga ko‘ra, bu namoyishda 110 mingdan ortiq fuqarolar qatnashdi. Bu haqda The Guardian nashri xabar berdi.
Namoyish AQSHda tanilgan bloger va o‘ng qanot populist Charli Kirkning o‘ldirilishidan so‘ng tashkil etildi. Unda ishtirokchi va siyosiy faol Tommi Robinson (asl ismi Stiven Kristofer Yaksli-Lennon) tomonidan olib borildi. Robinson yurish davomida “vatanparvarlik – kelajak”, “chegaralar – kelajak” kabi shiorlarni ilgari surib, mamlakatning “nixoyat uyg‘onib borganini” ta’kidladi.
Parallel ravishda “Irqchilikka qarshi kurash” tashkiloti ham zid yo‘nalishdagi namoyishni uyushtirdi. Unda taxminan 5 ming fuqaro ishtirok etdi. Politsiya ma’lumotlariga ko‘ra, namoyishchilarning aniq sonini belgilash qiyin bo‘lgan, ammo videokuzatuvlar va vertolyot tasvirlari orqali taxminiy raqamlar hisoblab chiqilgan.
Namoyish davomida ayrim ishtirokchilar tomonidan agressiv xatti-harakatlar sodir etilgani qayd etildi. London politsiyasi ma’lumotlariga ko‘ra, xodimlarga hujum qilingan, namoyishchilar kordonni buzishga uringan. Ular tomonidan traffik konuslari, shisha idishlar va boshqa buyumlar uloqtirilgan. Bunga javoban yuzlab maxsus jihozlangan politsiyachilar va safarbar etilgan bo‘linmalar tartibsizliklarning kengayishiga yo‘l qo‘ymadi.
Buyuk Britaniya ichki ishlar vaziri Suella Braverman tartibsizliklar chog‘ida politsiya xodimlariga hujum qilgan shaxslarni qat’iy tanqid qildi: “Tinch namoyish o‘tkazish huquqi mamlakatimiz demokratsiyasi uchun muhim. Ammo politsiya xodimlariga hujum qilganlar qonun oldida javob beradi. Jinoiy harakatlar qat’iy jazolanadi”, — dedi vazir.
Namoyish davomida texnologiya magnati Ilon Mask ham videokonferensiya orqali chiqish qildi. U Tommi Robinson bilan suhbatda Buyuk Britaniyada siyosiy o‘zgarishlar zarurligini ta’kidlab, parlamentni tarqatish va yangi saylovlar o‘tkazish lozimligini bildirdi.
Maskning chiqishi mamlakat siyosiy doiralarida keskin tanqidlarga duch keldi. Liberal-demokratlar yetakchisi Ser Ed Deyvi uning fikrlarini rad etdi: “Britaniya demokratsiyasi xorijlik texnologiya magnatlarining siyosiy o‘yinchog‘i bo‘lishi uchun juda qadrli. Mask Britaniya xalqi haqida emas, o‘z manfaati va shaxsiy foydasi haqida o‘ylaydi”, — dedi.
The Guardian yozishicha, namoyish davomida ayrim “Qirollikni birlashtiring” ishtirokchilari zid namoyishchilarning kichik guruhini atroflab olib, ikki tomon orasida qisqa muddatli to‘qnashuvlar yuzaga kelgan. Politsiya ularni ajratib, xavfsiz hududga evakuatsiya qildi va vaziyatni nazorat ostiga oldi.
“Zamin”ni Telegramʻda oʻqing!
