Tokio politsiyasi Haneda aeroportida ishlagan 21 yoshli xavfsizlik inspektori Ryu Matsumotoni qo‘lga oldi. U yo‘lovchilarning bagajini tekshirish vaqtida naqd pul o‘g‘irlashda gumon qilinmoqda.
Matsumoto tergovchilarga ish og‘ir bo‘lgani, hatto ishdan bo‘shashni o‘ylagani va o‘g‘irlikdan hayajon olishni istaganini aytgan. U pulni yashash xarajatlariga sarflashni mo‘ljallaganini ham tan oldi.
Ma’lumotlarga ko‘ra, u aprel oyidan beri xavfsizlik kompaniyasida ishlab kelgan va Japan Airlines shartnomasi asosida yo‘lovchilarni nazorat qilish vazifasini bajargan. Politsiya uning avgustdan beri 70-80 yo‘lovchidan jami 1,5 million yen (10 ming dollar) o‘g‘irlaganini taxmin qilmoqda.
So‘nggi voqea shanba kuni kechqurun sodir bo‘lgan. Yo‘lovchi e’tiborni chalg‘itganida, Matsumoto 90 ming yenni yashirincha olib, uni hojatxonadagi qog‘oz o‘ramiga yashirgani aniqlangan. Yo‘lovchi pul yo‘qligini fahmlagach, kuzatuv kameralaridagi yozuvlar gumondorni fosh qildi.
Manba: The Japan Times
“Zamin”ni Telegramʻda oʻqing!
