13 yoshli afg‘on bola KAM Air aviakompaniyasi samolyotining shassisiga yashiringan holda, Afg‘onistonning Kobul shahridan Dehliga uchib bordi. Bu voqea The Independent gazetasida xabar qilindi.
Afg‘onistonning Qunduz shahrida yashovchi o‘smir samolyot Dehlidagi Indira Gandi xalqaro aeroportiga qo‘nganidan so‘ng, ikki soatlik parvozdan keyin topilgan. Rasmiylarga ko‘ra, bola Kobul aeroportining cheklangan hududiga kirib, KAM Air samolyoti shassisining orqa bo‘linmasiga yashirinishga muvaffaq bo‘lgan. Qo‘nishdan so‘ng, aviakompaniya xodimlari uni samolyot yonida topib, aeroport xavfsizlik xizmatiga xabar bergan.
Dastlabki surishtiruvda bola, samolyotga qiziqish tufayli, xavf-xatarni anglamagan holda kirganini aytib o‘tgan. O‘smir Dehlidan keyin boshqa samolyotda Afg‘onistonga qaytarilgan.
Samolyot shassisida omon qolish holatlari kam uchraydi. Chiptasiz yo‘lovchilarning aksariyati gipoksiya, gipotermiya yoki shassi mexanizmlaridan olingan jarohatlar tufayli halok bo‘ladi. Aviatsiya eksperti Moxan Ranganatxan so‘zlariga ko‘ra, o‘smir «ehtimol, zich yopiq joyga kirib olgan, u germetizatsiya qilingan va unda yo‘lovchilar salonidagi haroratga yaqin harorat saqlangan bo‘lishi mumkin».
Ranganatxan bunday sharoitlarsiz taxminan 10 km balandlikda omon qolishning imkonsizligini tushuntirdi. Chunki bu balandlikda kislorodning past darajasi tezda hushdan ketish va o‘limga olib kelishi mumkin. -40°C dan -60°C gacha bo‘lgan harorat bir daqiqadan kamroq vaqt ichida sovuq qotishga, keyin esa gipotermiyaga olib keladi.
1947-yildan 2020-yilgacha bo‘lgan davrda AQSH Federal fuqaro aviatsiyasi boshqarmasi tomonidan ko‘rib chiqilgan samolyot shassisidagi 128 ta chiptasiz sayohat holatlarining 75 foizdan ortig‘i og‘ir sharoit tufayli o‘lim bilan yakunlangan.
“Zamin”ni Telegramʻda oʻqing!
