Netanyaxu: Isroil "ishni o‘z qo‘li bilan tugatadi"

Agar XAMAS AQSH prezidenti Donald Tramp tomonidan taklif qilingan G‘azo tinchlik rejasi shartlarini rad etsa yoki bajarmasa, Isroil ishni o‘z qo‘li bilan tugatadi. Bu haqda Isroil bosh vaziri Benyamin Netanyaxu Vashingtonda Tramp bilan qo‘shma matbuot anjumanida ma’lum qildi, deya xabar bermoqda Sky News.

"Buni oson yoki qiyin yo‘l bilan qilish mumkin. Biz barcha tomonlarga buni tinch yo‘l bilan hal qilish imkoniyatini bermoqdamiz", dedi Netanyaxu.

Uning ogohlantirishiga ko‘ra, agar XAMAS rejani rad etsa yoki qabul qilib, keyin unga qarshi turishga harakat qilsa, Isroil "ishni o‘z qo‘li bilan tugatadi".

Netanyaxu Isroilning harbiy maqsadlariga erishish kerakligini ta’kidlab, mamlakat "XAMAS G‘azoda qolishi uchun eng yaxshi yoshlarimizni qurbon qilib, bu dahshatli kurashni olib bormaganini" aytdi.

Charos Zarqarayeva

«ZAMIN.UZ» muharriri