O‘zbekistonda yuz bergan g‘ayrioddiy holat mahalliy va xalqaro jamoatchilik e’tiborini o‘ziga tortdi. Ijtimoiy tarmoqlarda tarqalgan videomurojaatda AQSH fuqarosi o‘zining “Lamborghini” avtomobilida mamlakatdan chiqib keta olmayotganini aytgan. Bu holat atrofidagi muhokamalardan keyin Bojxona qo‘mitasi raisining matbuot kotibi rasmiy izoh berdi.
Ma’lum qilinishicha, xorijiy fuqaro boshqaruvidagi qimmatbaho sportkarning O‘zbekistonda bo‘lish muddatini belgilangan qoidalardan deyarli ikki oyga oshirib yuborgan. Shu sababli avtotransport vositasini mamlakatdan chiqarish vaqtincha taqiqlangan va muammoni hal etish uchun to‘lov talab etilgan.
Bojxona organlari ma’lumotlariga ko‘ra, amerikalik haydovchi belgilangan tartibda 23 million 72 ming so‘m miqdordagi yig‘imni to‘lab, ma’muriy javobgarlikdan ozod etilgan. Barcha jarayonlar rasmiylashtirilgandan keyin xorijiy fuqaro o‘zining “Lamborghini”sida mamlakat hududidan chiqib ketishiga ruxsat berildi.
Shu bilan birga, bank amaliyotlarini amalga oshirish jarayonida qiyinchiliklar yuzaga kelgan. Chunki xorijlik shaxs dam olish kunlari valyuta almashtirish va naqd pul yechib olish imkoniga ega bo‘lmagan. Natijada barcha jarayonlar kechiktirilib, masala biroz muddatdan so‘nggina hal etildi.
Eslatib o‘tamiz, amaldagi qonunchilikka ko‘ra, xorijiy avtotransport vositalari O‘zbekiston hududida 90 kundan ko‘p turishi mumkin emas. Ushbu holatda esa sportkar 2025 yil 2 may kuni mamlakatga kiritilgan va uni chiqarib olish muddati 2 avgust etib belgilangan. Xorijiy fuqaro bu haqda oldindan ogohlantirilgan bo‘lishiga qaramay, qoidalarga amal qilmagani sababli mazkur jarima hisoblandi.
Mutasaddilar ta’kidlashicha, bu kabi holatlar har qanday fuqaro uchun qonun oldida tenglik prinsipini yana bir bor yodga soladi. Qoidalarni buzish nafaqat mahalliy aholi, balki chet ellik mehmonlar uchun ham bir xil tartibda javobgarlikni nazarda tutadi.
“Zamin”ni Telegramʻda oʻqing!
