Myanmaning markazida joylashgan Chaung-U shaharchasida harbiy rejimga qarshi tinch yurish va buddaviylarning Tadingyut (Chiroqlar bayrami) tadbirlari qonli tahqirga aylandi. Guvohlar aytishicha, motoparaplan (motorli paraplan) havodan bomba tashlagani ortidan maydondagi odamlar parokanda bo‘ldi. Rasmiy ma’lumotlarga ko‘ra, kamida 40 kishi, jumladan bolalar hayotdan ko‘z yumdi, yana taxminan 80 nafar fuqaro turli darajada jarohat olgan.
Huquqni himoya qiluvchi tashkilotlar, xususan Amnesty International, hodisani keskin qoralab, tinch aholini himoya qilish, xalqaro gumanitar huquq qoidalariga qat’iy amal qilish zarurligini ta’kidlamoqda. Ularning fikricha, harbiylar mamlakatning katta qismida nazoratni yo‘qotganiga qaramay, qarshilik ko‘rsatilayotgan hududlarga havodan ham, yerdan ham hujumlarni davom ettirmoqda.
Eslatib o‘tamiz, Myanma 2021 yilgi harbiy to‘ntarishdan beri ichki to‘qnashuvlar girdobiga tushib qolgan. Harbiy xuntaga qarshi qurolli va siyosiy qarshilik kuchaygani, ayniqsa, so‘nggi oylarda fuqarolar yashaydigan hududlar uchun xavfni yanada oshirgani qayd etilmoqda.
Rejaga ko‘ra, 2025-yil dekabrida to‘ntarishdan keyingi ilk saylovlar o‘tkazilishi kerak. Biroq kuzatuvchilar bu jarayonni haqiqiy siyosiy inklyuziyadan ko‘ra «ko‘zbo‘yamachilik» deb baholamoqda va saylov yoqinlashishi zo‘ravonlikning yangi to‘lqiniga turtki berishi mumkinligidan tashvish bildirmoqda.
Chaung-Udagi hujum ortidan jabrlanuvchilarga shoshilinch tibbiy yordam va qon topshirish bo‘yicha chaqiriqlar berilmoqda. Huquqni muhofaza qiluvchi tuzilmalar jinoyatni tezkor va xolis tergov qilish, aybdorlarni javobgarlikka tortish, eng muhimi — tinch aholini himoyalash bo‘yicha amaliy choralar ko‘rishga chaqirmoqda.
“Zamin”ni Telegramʻda oʻqing!
