Avstraliya sohilida tarixiy topilma aniqlandi. 28-oktyabr kuni G‘arbiy Avstraliyaning Esperans shahri yaqinidagi Uorton-Bich plyajida Braunlar oilasi chiqindilarni yig‘ish chog‘ida ichida xatlar bo‘lgan shisha idishni topdi, deb xabar berdi Associated Press.
Schweppes ichimligi uchun ishlatilgan shisha ichida 1916-yil 15-avgustda yozilgan ikkita xat bo‘lib, ular 27 yoshli Malkolm Nevill va 37 yoshli Uilyam Xarli tomonidan yozilgan. Har ikki askar Birinchi jahon urushi paytida HMAT A70 Ballarat kemasida xizmat qilgan.
Ma’lum bo‘lishicha, xat yuborilganidan bir yil o‘tib Nevill frontda halok bo‘lgan, Xarli esa tirik qaytib, 1934-yilda saratondan vafot etgan. Nevill shishani topgan odamdan uning maktubini onasiga yetkazishni iltimos qilgan.
Deb Braunning ta’kidlashicha, shisha suvda uzoq suzmagan — to‘lqinlar uni qirg‘oqqa chiqargan va u asr davomida qum ostida saqlanib qolgan. Hatto qog‘ozlar ho‘l bo‘lganiga qaramay, matn aniq o‘qiladigan holatda qolgan.
Xarlining nabirasi Enn Terner bu voqeani “mo‘jiza” deb atagan. Mutaxassislar bu topilmani Birinchi jahon urushidagi inson taqdirlarini yodga soluvchi tarixiy yodgorlik sifatida baholamoqda.
“Zamin”ni Telegramʻda oʻqing!
