Tailandda xorijlik sayyohlarni olib ketayotgan avtobus halokatga uchradi. Hodisa mamlakatning shimolidagi tog‘li Lampang provinsiyasida sodir bo‘lgan, deb xabar berdi Maticon gazetasi.
Ma’lum qilinishicha, avtobus Chiang Maydan Bangkok tomon harakatlanayotgan bo‘lgan. Yo‘lning burilish qismida haydovchi boshqaruvni yo‘qotgan va transport vositasi ag‘darilib ketgan.
Avtobusda jami 38 nafar yo‘lovchi bo‘lgan, ularning barchasi xorij fuqarolari — asosan arab davlatlaridan kelgan sayyohlar.
Baxtsiz hodisa oqibatida 12 kishi jarohatlangan, shulardan ikki nafari og‘ir ahvolda kasalxonaga yotqizilgan. Mahalliy shifokorlar ularning hayoti uchun kurashmoqda.
Politsiya ma’lumotiga ko‘ra, hodisaning sabablari hozircha aniqlanmoqda. Dastlabki taxminlarga ko‘ra, yo‘lning sirpanchiq holati yoki haydovchining charchog‘i fojia sabablaridan biri bo‘lishi mumkin.
Tailand rasmiylari voqea joyiga tez yordam va qutqaruv guruhlarini yuborgan. Holat bo‘yicha tergov ishlari boshlangan.
“Zamin”ni Telegramʻda oʻqing!
