Vengriya bosh vaziri Viktor Orban Yevropa Ittifoqi va NATOga Rossiyadan ehtimoliy hujum bo‘lishi haqidagi qo‘rquvlarni jiddiy qabul qilmasligini ochiq bayon qildi. Uning ta’kidlashicha, bu taxminlar mutlaqo asossiz va hatto kulgili ekan.
Orbanning gapirishicha, Rossiyaning iqtisodiy va harbiy salohiyati YEI va NATO bilan taqqoslaganda ancha past. “Hammaga aytaman: Rossiya Yevropaga yo NATOga hujum qiladi, degan gaplar — jiddiy fikr emas. Yevropa ittifoqi aholisi 400 milliondan oshadi, Rossiya esa uch barobar kam. Qolaversa, 27 davlatdan iborat YEIning umumiy harbiy qudrati ham ruslarnikidan ustun”, — dedi u Axel Springer mediakorporatsiyasi rahbari Matias Dyopfnerning MD meets podkastida.
Shu bilan birga, Orban Ukrainadagi vaziyatni misol qilib, Rossiyaning uch yildan beri Ukraina hududini to‘liq egallay olmayotganini ta’kidladi. “Agar ular Ukrainada bunga erisholmayotgan bo‘lsa, qanday qilib butun Yevropaga xavf solishi mumkin?” — deya u ritorik savol qo‘ydi.
Biroq Orbanning qarashlari hamisha bir tomonlama emas. U Rossiyaning ehtimoliy mag‘lubiyati kutib bo‘lmas xavflarni keltirib chiqarishi mumkinligini ham aytib o‘tdi. “Agar yadroviy davlat yadroviy qurol ishlatmasdan urushda yutqazsa, u holda yadroviy qurol ishlatish xavfi paydo bo‘lishi tabiiy”, — dedi u. Unga ko‘ra, bu — xalqaro xavfsizlikka jiddiy tahdid solishi mumkin.
Orban YEI yetakchilarining urush borasidagi siyosatini ham tanqid qildi. Xususan, Germaniya kansleri Fridrix Mersni u “urush tarafida turishda” aybladi. “Men uning o‘rnida bo‘lsam, tinchlikka xizmat qiladigan qadam tashlagan bo‘lardim”, — dedi u. Ushbu fikrlar ortidan Orban vaqt Rossiya tomonida ketmoqda, YEI esa orqa qolmoqda, degan xulosa qildi.
Podkast davomida Vengriya bosh vaziri Germaniyaning sobiq kansleri Angela Merkel haqida iliq so‘zlar bilan to‘xtalib o‘tdi. Uning aytishicha, YEI yig‘ilishlarida tinchlik va hamkorlikka da’vat qilib chiqqan siyosatchilar orasida aynan Merkel bilan ko‘proq yonma-yon fikr bildirishgan. Biroq migratsiya va ekologiya masalalarida ularning pozitsiyalari doimo farq qilgan. “Ba’zida u menga qattiq ovozda gapirardi, hatto xotinimdan ham ko‘proq”, — deb sho‘xlik bilan esladi Orban.
Matnda Rossiyaning yadroviy doktrinasi haqidagi o‘zgarishlar ham tilga olindi. 2024-yil noyabrida Putin imzolagan yangi hujjatga ko‘ra, yadroviy quroli bo‘lmagan davlatning yadroviy davlat bilan birgalikda Rossiyaga qarshi tajovuzi ham yadroviy xavf sifatida qabul qilinadi.
Orbanning bayonoti Yevropa xavfsizligi, Rossiya bilan munosabatlar va Ukrainadagi vaziyat atrofidagi bahslarni yanada qizitdi. Yevropa siyosatida esa uning bunday keskin va mustaqil bayonotlari alohida e’tibor markazida qolmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
