Nigeriyada yana jamiyatni titratgan va butun mamlakat bo‘ylab xavotir uyg‘otgan fojiali hodisa qayd etildi. 21-noyabr kuni qurollangan noma’lum shaxslar katolik internat maktabiga bosqin uyushtirib, 200 dan ortiq o‘smir o‘quvchi hamda bir necha o‘qituvchini o‘g‘irlab ketdi. Bu haqda Xristianlar assotsiatsiyasi ma’lumotiga tayanib, NBC News xabar tarqatdi.
Ma’lum qilinishicha, hujum Nigeriyaning g‘arbiy qismida joylashgan, 12–17 yosh orasidagi o‘quvchilar tahsil oladigan Avliyo Mariya o‘rta maktabida sodir bo‘lgan. Qurolli guruh jami 215 nafar o‘quvchi va 12 nafar o‘qituvchini noqonuniy ravishda olib ketgan. Bu — bir hafta ichida sodir bo‘lgan ikkinchi shunga o‘xshash hujum.
Politsiya ma’lumotlariga ko‘ra, voqea sodir bo‘lgan paytda maktabda xavfsizlik kuchlari bo‘lmagan. Hodisa haqida ma’lum bo‘lishi bilan joyga harbiylar va maxsus bo‘linmalar yo‘llangan. Shtat hukumati esa maktab o‘quv jarayonini hukumat ruxsatisiz qayta boshlaganini qat’iy tanqid qilib, bu qaror o‘quvchi va xodimlarni xavf ostida qoldirganini ta’kidlagan.
Mahalliy aholi va guvohlar maktabda hujum vaqtida politsiya ham, qo‘riqlash xizmati ham yo‘q ekanini aytmoqda. Bu esa hujumchilarga qarshiliksiz harakat qilish imkonini bergan.
Nigeriyadagi bu yangi hodisa mamlakatda bolalar o‘g‘irlanishi, qurolli to‘dalar faoliyati va xavfsizlik tizimining yetishmovchiliklari yanada keskinlashib borayotganini ko‘rsatmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
