Shimoliy Koreya rahbari Kim Chen In mamlakat harbiy aviatsiyasining kelajagiga oid muhim bayonot berdi. Uning ta’kidlashicha, KXDR havo kuchlari yaqin vaqt ichida strategik ahamiyatga ega bo‘lgan tamoman yangi qurollar bilan ta’minlanadi va bu bilan armiya zimmasiga yanada «muhimroq vazifa» yuklanadi.
Koreya Markaziy axborot agentligi tarqatgan ma’lumotga ko‘ra, Kim Chen In partiya va davlat rahbariyatining aviatsiyaga bo‘lgan ishonchini alohida urg‘u bilan qayd etgan. U «Koreya Demokratik Respublikasi havo kuchlari strategik harbiy resurslar bilan boyitilishi, shu bilan birga yangi, hal qiluvchi vazifalarni o‘z zimmasiga olishi» kutilganini ta’kidlagan.
Kim Chen In bu bayonotni havo kuchlari tashkil etilganining 80-yilligiga bag‘ishlangan tadbirda berdi. Uning so‘zlariga ko‘ra, yangi strategik resurslar va maxsus texnologiyalar joriy etilsa, KXDR aviatsiyasi mamlakat mudofaa salohiyatining eng muhim tayanch ustuniga aylanadi.
Shu bilan birga, u havo kuchlari endilikda «yadroviy to‘siqda aktiv rol o‘ynab borayotganini» ham eslab o‘tdi. Rahbarning fikriga ko‘ra, bu bo‘linmalar dushman tomonidan amalga oshirilishi mumkin bo‘lgan barcha turdagi josuslik harakatlariga, havodagi tahdidlarga va ehtimoliy harbiy provokatsiyalarga qattiq va qat’iy javob qaytarishi zarur.
Oxirgi yillarda KXDR o‘z harbiy dasturini kuchaytirayotgani, xususan, raketa texnologiyalari va yadroviy salohiyatni kengaytirishga e’tiborni oshirgani kuzatilmoqda. Kim Chen Inning navbatdagi bayonoti esa mamlakatning harbiy aviatsiyasi ham strategik yo‘nalishda yangi bosqichga ko‘tarilayotganini ko‘rsatadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
