AQSHda Rojdestvo bayrami kuni mamlakat lotereyalari tarixidagi eng shov-shuvli voqealardan biri sodir bo‘ldi. Powerball lotereyasida tikilgan jekpot 1 milliard 817 million dollarga yetdi va bu ulkan summa Arkanzas shtatidan sotib olingan yagona chipta sohibiga nasib qildi.
Qayd etilishicha, mazkur yutuq AQSH lotereyalari tarixidagi to‘rtinchi eng katta jekpot sifatida qayd etildi. Bu esa Powerball o‘yinlariga bo‘lgan qiziqish va ishtirokchilar soni qanchalik yuqori ekanini yana bir bor ko‘rsatib berdi.
G‘olib pulni qanday shaklda olishni o‘zi tanlaydi. Agar u bir martalik to‘lov variantini ma’qul ko‘rsa, federal soliqlar ushlab qolinganidan so‘ng taxminan 835 million dollar qo‘liga tegadi. Bu ham har qanday holatda hayotni tubdan o‘zgartirishga yetarli mablag‘ hisoblanadi.
Mutaxassislarning ta’kidlashicha, ushbu lotereyada g‘alaba qozonish ehtimoli juda past — 292 milliondan 1 ta. Shunga qaramay, jekpot ketma-ket 46 ta tiraj davomida o‘ynalmay qolgani sababli summa bosqichma-bosqich oshib bordi. So‘nggi kunlarda esa bayram munosabati bilan biletlarga bo‘lgan talab keskin ortdi.
Powerball lotereyasi AQSHning 45 ta shtatida o‘tkaziladi va har bir bilet narxi atigi 2 dollarni tashkil qiladi. Hozircha omadli chipta egasining ismi oshkor etilmadi, faqatgina u Arkanzas shtati hududida sotib olingani ma’lum.
Shubhasiz, bu yutuq nafaqat g‘olib uchun, balki butun mamlakatda lotereyalar tarixida qoladigan voqeaga aylandi. Rojdestvo bayrami esa kim uchundir chin ma’noda unutilmas kun bo‘ldi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
