Zohran Mamdani rasman Nyu-York shahri meri sifatida qasamyod qildi va bu marosim shahar tarixida mutlaqo yangi sahifa bo‘ldi. U lavozimga kirishish oldidan Qur’onga qo‘l qo‘yib qasamyod qildi. Manbalarga ko‘ra, bu Nyu-York meri qasamyod marosimida Qur’ondan foydalangan ilk holat hisoblanadi.
Marosim Yangi yil arafasida, yarim tunda Manhettendagi City Hall metro bekatida — ko‘p yillardan beri yopiq, tarixiy va shahar meriyasi ostida joylashgan stansiyada o‘tkazildi. Qasamyodni Nyu-York shtati bosh prokurori Letitiya Jeyms qabul qilgani ham qayd etilgan.
Qizig‘i, AQSHda qasamyodda albatta diniy kitob ishlatish shart emas. Ammo Nyu-Yorkdagi ko‘pgina avvalgi merlar an’anaviy ravishda Injil bilan qasamyod qilishgani aytilyapti. Mamdanining Qur’on tanlashi esa shaharning turfa madaniyati va yangilanib borayotgan ruhini yana bir bor ko‘rsatdi.
Eslatib o‘tamiz, 34 yoshli demokrat Zohran Mamdani 2025 yil 4 noyabrdagi saylovda g‘alaba qozongan va 2026 yil 1 yanvardan rasman merlikka kirishgan. U Nyu-Yorkning birinchi musulmon meri, birinchi janubiy osiyolik meri va “avlodlar orasidagi eng yosh” rahbarlardan biri sifatida ham tarixga kirdi.
Mamdani qasamyoddan keyin “Bu haqiqatan ham umr bo‘yi beriladigan sharaf va imtiyoz” degan mazmundagi so‘zlarni aytgani keltiriladi. Shu bilan birga, turli siyosiy qarama-qarshiliklarga qaramay, saylovdan keyin Donald Tramp bilan uchrashuv ham bo‘lib o‘tgani, tomonlar o‘sha paytda muloqotni nisbatan muloyim ohangda o‘tkazgani haqida ham xabarlar bor.
Qisqasi, Nyu-York yangi yilni oddiy yangilik bilan emas, tarixiy burilish bilan boshladi. Endi eng katta savol bitta: Mamdani bergan va’dalarini qay tarzda amalda ko‘rsata oladi va shaharga haqiqiy o‘zgarish olib keladimi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
