AQSH Davlat departamenti B1/B2 (turistik va ishbilarmonlik) vizalari bo‘yicha yangi tartibni e’lon qildi: ayrim davlatlar fuqarolari viza olish jarayonida majburiy pulli garov (bond) qo‘yishi kerak bo‘ladi. Bu chora asosan B1/B2 vizasi muddatini buzish (overstay) ko‘rsatkichlari yuqori deb baholangan mamlakatlar uchun qo‘llanadi.
Qaysi davlatlar ro‘yxatda?
Davlat departamenti “viza garovi talab qilinadigan davlatlar” ro‘yxatini e’lon qilgan va unda amalga kirish sanasi ham ko‘rsatilgan. Markaziy Osiyodan, xususan:
- Qirg‘iziston — 2026 yil 21 yanvardan
- Tojikiston — 2026 yil 21 yanvardan
- Turkmaniston — 2026 yil 1 yanvardan
Ro‘yxatda Afrika, Osiyo, Karib havzasi va Lotin Amerikasi davlatlaridan ham bir qator mamlakatlar bor (masalan, Venesuela, Nigeriya va boshqalar). Ro‘yxat 2026 yil 6 yanvar holatiga “oxirgi yangilangan” deb berilgan.
Garov miqdori qancha?
Agar ariza beruvchi B1/B2 vizasi uchun “loyiq” deb topilsa, u 5 ming, 10 ming yoki 15 ming dollar miqdorida garov qo‘yadi. Aniq summa vizaviy suhbat vaqtida konsul tomonidan belgilanadi. Shu bilan birga, DHS’ning I-352 shakli (Form I-352) ham taqdim etiladi.
To‘lov qayerga va qanday qilinadi?
Eng muhim jihati: garov faqat konsul ko‘rsatma berganidan keyin to‘lanadi. Ariza beruvchi Pay.gov orqali to‘lov qilish uchun to‘g‘ridan to‘g‘ri rasmiy havola oladi va uchinchi tomon saytlaridan foydalanmaslik qat’iy aytilgan.
Yana bir “sovuq dush” — garov to‘lash vizani kafolatlamaydi. Konsul yo‘riqnomasisiz to‘langan pullar qaytarilmasligi ham ochiq yozilgan.
AQSHga kirish-chiqishda ham cheklov bor
Garov qo‘ygan vizasi borlar AQSHga faqat belgilangan aeroportlar orqali kirib-chiqishi shart:
- Boston Logan (BOS)
- New York JFK (JFK)
- Washington Dulles (IAD)
Agar bu shartga amal qilinmasa, kirish rad etilishi yoki chiqish to‘g‘ri qayd etilmasligi mumkin — bu esa keyinchalik muammoni ko‘paytirishi ehtimol.
Qachon garov qaytariladi, qachon “kuyadi”?
Departamentga ko‘ra, garov avtomatik ravishda quyidagi holatlarda qaytariladi:
- AQSHdan ruxsat etilgan muddat ichida chiqib ketgani DHS tomonidan qayd etilsa;
- viza muddati tugaguncha umuman AQSHga safar qilmasa;
- aeroportda AQSHga kirishi rad etilsa.
Lekin agar vizada belgilangan muddatdan ortiq qolish kabi shartlar buzilsa, ish USCIS’ga yuboriladi va garov shartlari buzilgan-buzilmagani shu yerda ko‘rib chiqiladi.
Xulosa
Qisqasi, B1/B2 vizasi “oldim — uchdim” degan yengil formatdan ancha qattiq nazoratli tartibga o‘tib borayapti: kimgadir 5 ming dollar, kimgadir 15 ming dollarlik “depozit-rejim” qo‘shilyapti. Agar safar rejangiz bor bo‘lsa, ariza topshirishdan oldin rasmiy ro‘yxat va sanalarni yana bir bor tekshirib qo‘yish foydali — ro‘yxat vaqti-vaqti bilan yangilanyapti.
“Zamin”ni Telegramʻda oʻqing!
