Moldova prezidenti Mayya Sandu referendum o‘tkazilsa, o‘z mamlakati Ruminiya bilan birlashishi uchun ovoz berishga tayyor ekanini aytdi. Ruminiya — NATO va Yevropa Ittifoqi a’zosi, Sandu esa bu yo‘lni Moldovani tashqi bosimlardan himoya qilishning ehtimoliy kafolati sifatida ko‘ryapti. U bu haqda Britaniyadagi The Rest Is Politics podkastiga bergan intervyusida gapirdi.
Davlat rahbarining ta’kidlashicha, hozirgi geosiyosiy muhitda Moldova kabi kichik davlat uchun demokratiya va suverenitetni saqlab qolish yanada qiyinlashib bormoqda. Sandu avval ham bir necha bor Moskva tomonidan mamlakat ichki siyosatiga aralashish urinishlari bo‘layotganini bildirgan va bu xavotirlarini yana bir bor takrorlagan.
Shu bilan birga, real kayfiyatlar ham bor. Reuters ma’lumotlariga ko‘ra, 2,4 million aholisi bor Moldovaning taxminan 1,5 million kishisi Ruminiya fuqaroligiga ega. Ammo so‘rovlarda mamlakat aholisining faqat taxminan uchdan biri birlashish g‘oyasini qo‘llab-quvvatlashi qayd etilgan.
Sandu ham buni yashirmadi: u hozircha jamoatchilikda ushbu tashabbusni to‘liq qo‘llaydigan ko‘pchilik yo‘qligini tushunishini aytgan. Shu sabab, uning fikricha, Yevropa Ittifoqiga qo‘shilish — ancha “realistik” ssenariy. Moldova hukumati esa mamlakatni 2030 yilgacha YEIga olib kirish maqsadini oldinga qo‘ygan, lekin bu yo‘lda Kishinyovni og‘ir islohotlar va siyosiy qarshiliklar kutib turibdi.
Qisqasi, Sandu aytgan gap — “ertaga birlashamiz” degani emas, balki Moldovaning xavfsizlik va kelajak tanlovlari qanchalik keskinlashganini ko‘rsatadi. Siyosatda shunday: ba’zan bir og‘iz gap butun mintaqani “uyg‘otib” yuboradi.
“Zamin”ni Telegramʻda oʻqing!
