Donald Tramp ma’muriyati AQSH immigratsiya siyosatini keskinlashtirish yo‘lida navbatdagi shov-shuvli qadamni tashladi. Joriy yilning 21 yanvaridan boshlab dunyoning 75 ta davlati, xususan O‘zbekiston va Qozog‘iston fuqarolari uchun immigratsion vizalar berish va arizalarni ko‘rib chiqish noma’lum muddatga to‘xtatildi.
Taqiq ostiga tushgan davlatlar va sabablar
AQSH Davlat departamenti tomonidan e’lon qilingan ro‘yxatdan Markaziy Osiyo davlatlaridan tashqari, Pokiston, Bangladesh, Rossiya, Belarus, Gruziya, Armaniston hamda Afrika va Lotin Amerikasining o‘nlab mamlakatlari joy olgan.
Vashingtonning bunday keskin qaroriga quyidagi omillar asos qilib ko‘rsatilmoqda:
- Moliyaviy yuk xavfi: Ushbu mamlakatlardan kelayotgan muhojirlar Amerikada davlat ijtimoiy yordamlariga qaram bo‘lib qolishi mumkin deb hisoblanmoqda.
- Tekshiruvlarni kuchaytirish: Viza tizimi «to‘liq qayta ko‘rib chiqish» jarayonidan o‘tkazilmoqda. Maqsad — arizachilarni eng yuqori darajada saralash va skrining qilish.
- Xavfsizlik chorasi: Noyabr oyida sodir bo‘lgan ko‘ngilsiz hodisalardan so‘ng, Tramp ma’muriyati «Uchinchi dunyo» mamlakatlaridan migratsiyani cheklashga va’da bergan edi.
Vizasi tayyor bo‘lganlar uchun yomon xabar
Reuters nashrining xabariga ko‘ra, cheklovlar hatto vizasi chop etilishga tayyor turgan yoki konsullikdan olib chiqilmagan shaxslarga ham tegishli. Davlat departamenti xodimlariga bunday vizalarni ham rad etish bo‘yicha maxsus ko‘rsatma berilgan.
Sayyohlik (Visitor) vizalariga ta’sir qilmaydi
Yaxshi xabar shundaki, bu cheklovlar sayyohlik va vaqtinchalik tashrif (B1/B2) vizalariga daxl qilmaydi. Buning asosiy sababi — AQSH 2026 yilgi Futbol bo‘yicha Jahon chempionati va 2028 yilgi Olimpiya o‘yinlariga mezbonlik qilishidir. Ma’muriyat sport muxlislari va sayyohlar oqimini saqlab qolishga majbur.
Immigratsiya tizimidagi inqiroz
Ekspertlarning fikricha, ushbu taqiq kelasi bir yil ichida 315 mingga yaqin qonuniy muhojirning yo‘lini to‘sadi. Tramp lavozimga kelganidan beri 100 mingdan ortiq viza bekor qilingan bo‘lib, hatto yuqori malakali mutaxassislar uchun mo‘ljallangan H-1B vizalariga ham yangi to‘lovlar va to‘siqlar joriy etilmoqda.
«Bu qaror AQSHga kelayotgan qonuniy muhojirlarning deyarli yarmiga taqiq qo‘yish demakdir», — deydi Immigratsiya tadqiqotlari direktori Devid Bir.
Sizningcha, AQSHning bunday keskin cheklovlari noqonuniy migratsiyani kamaytiradimi yoki aksincha, odamlarni xavfli yo‘llarni izlashga majbur qiladimi?
“Zamin”ni Telegramʻda oʻqing!
