Volodimir Zelenskiy ma’lum qilishicha, AQSH ma’muriyati urushni yoz boshigacha — ya’ni iyun oyigacha — tugatishni maqsad qilgan va shu yo‘nalishda “aniq qadamlar jadvali”ga o‘xshash muzokaralar rejasini taklif etmoqda.
Prezidentning aytishicha, Vashington yangi “energetik sulh” tashabbusini — energetik obyektlarga zarba bermaslik g‘oyasini — ilgari surgan. Kiyev bu taklifga rozilik bildirgan, biroq Rossiya tomoni hozircha javobni keyinroq berishini bildirgani aytilmoqda.
Mayamida uchrashuv g‘oyasi birinchi bor yangradi
Eng diqqatga sazovor nuqta — Mayamida navbatdagi raund o‘tishi mumkinligi. Zelenskiyga ko‘ra, AQSH ilk bor Ukraina va Rossiya muzokara guruhlarining Amerika hududida uchrashuvini taklif etgan va bu uchrashuv taxminan bir haftadan so‘ng bo‘lishi mumkin. Ukraina ishtiroki allaqachon tasdiqlangan.
Bu orada Kreml matbuot kotibi Dmitriy Peskov yangi raund “yaqin orada” bo‘lishini aytgan, ammo uning bayonotida uchrashuv AQSHda o‘tishi haqida gap bo‘lmagani ham qayd etilgan.
Eng og‘ir nuqtalar hali ham stol ustida
Zelenskiy muzokaralarda hal bo‘lmay kelayotgan eng qiyin masalalarga ham to‘xtaldi. Unga ko‘ra, ayrim “tugun”lar Ukraina–AQSH–Rossiya ishtirokidagi ehtimoliy uch tomonlama liderlar uchrashuvi formatida muhokama qilinishi mumkin.
Territoriya bo‘yicha bahs esa o‘sha-o‘sha: Donesk viloyati yuzasidan Rossiya butun hudud ustidan nazoratni talab qilayotgan paytda, Ukraina “qaysi joyda turibmiz — o‘sha yerda qolamiz” tamoyilini o‘t ochishni to‘xtatish uchun eng ishonchli variant deb hisoblashini qayta tasdiqlagan.
Shu bilan birga, AQSH Donbassda erkin iqtisodiy zona tashkil etishni murosa varianti sifatida taklif qilgani aytilmoqda. Ammo bu g‘oyani na Ukraina, na Rossiya tomoni jiddiy qo‘llab-quvvatlamayapti — har kimda o‘z “qizil chizig‘i” bor va u chiziq hali o‘chmagan.
Yana bir ochiq qolgan yirik savol — Zaporoje atom elektr stansiyasining kelajagi. Bu yo‘nalishda ham hozircha umumiy yechim yo‘qligi bildirilgan.
Trampning signali qattiq, kalendar ham aniq
Bu fon ortida Donald Tramp ham “yozgacha natija kerak” degan ishorani ochiq beryapti: Zelenskiyning so‘zlariga ko‘ra, AQSH tomoni iyun oyigacha kelishuvga kelish uchun bosim mexanizmlarini ham ishga solishi mumkin.
Xulosa shu: reja bor, maydon (Mayami) ham aytilayapti, “energetik sulh”ga prinsipial rozilik ham bildirilgan. Endi eng muhim savol bitta — Rossiya tomoni javobni qachon va qanday beradi. Chunki diplomatiyada “keyinroq aytamiz” degan ibora ba’zan pauza, ba’zan esa taktik to‘siq bo‘lib chiqadi.
“Zamin”ni Telegramʻda oʻqing!
