Buyuk Britaniyada sobiq shahzoda Endryu Mauntbetten-Vindzor atrofidagi mojaro yangi bosqichga chiqdi. 19-fevral kuni politsiya «xizmat mavqeini suiiste’mol qilish» (misconduct in public office) gumoni bilan Norfolkdan bo‘lgan oltmish yoshlardagi erkakni hibsga olganini ma’lum qildi. Ayni paytda Byorkshir va Norfolkdagi manzillarda tintuv ishlari ham olib borilmoqda. Hozircha u politsiya hibsida saqlanyapti.
E’tiborli jihati — huquq-tartibot idoralari rasman hibsga olingan shaxs ismini ochiqlamadi. Ular milliy qoidalarga tayanilgan holda «ism aytilmaydi», deya izoh bergan va ish «faol tergov» bosqichida ekanini, axborot tarqatishda ehtiyot bo‘lish kerakligini ta’kidlagan. Biroq jamoatchilikdagi katta qiziqish sabab ayrim OAVlar bu holatni aynan Endryu bilan bog‘lamoqda.
Bu voqea, albatta, bo‘sh joydan paydo bo‘lmadi. Endryuning nomi bir necha yildan buyon marhum moliyachi Jeffri Epshteyn bilan bog‘liq mojarolar fonida tilga olinib keladi. Qayd etilishicha, AQSH tomonidan e’lon qilingan hujjatlar va materiallar ortidan ayrim ayblovlar yana kun tartibiga chiqqan, politsiya esa «jamoatchilik manfaati» yuqori bo‘lgani uchun tergovdagi yangiliklarni belgilangan vaqtda e’lon qilishini aytgan.
Manbalarga ko‘ra, Endryu o‘tgan yili o‘zining mazkur aloqalari sababli unvonlaridan mahrum qilingan. Bugungi hibs esa nafaqat uning shaxsiy imijiga, balki monarxiya atrofidagi umumiy muhitga ham qattiq zarba bo‘lishi mumkin — chunki bu ish endi OAVlarda «oddiy mojaro» emas, «huquqiy jarayon» sifatida ko‘rila boshladi.
Shu o‘rinda Buyuk Britaniya bosh vaziri Kir Starmer «hech kim qonundan ustun emas» degan mazmunda bayonot berib, AQSHdagi tergov organlari bilan hamkorlik qilish kerakligini aytgani qayd etilmoqda. Tergov harakatlari esa davom etyapti.
Qisqasi: bu hikoyada “shov-shuv” emas, faktlar hal qiladi. Endi hamma narsa dalillar va tergov natijasiga borib taqaladi — va bu safar PR bilan “o‘tkazib yuborish” qiyinroq bo‘lishi mumkin.
“Zamin”ni Telegramʻda oʻqing!
