Ma’lum qilinishicha, Herbalife rasman e’lon qilgan xabarga ko‘ra, Ronaldu HBL Pro2col Software, LLC (Pro2col texnologiyasiga egalik qiluvchi tuzilma)da 10 foiz ulushni qo‘lga kiritgan. Buning uchun u 7,5 million dollar sarmoya kiritgan, shuningdek, loyihaga xizmatlar va homiylik huquqlarini ham qo‘shib berishga majburiyat olgan.
Pro2col’ning asosiy g‘oyasi oddiy: har kimga “bitta standart” emas, balki shaxsiy salomatlik rejasi. Platforma foydalanuvchining kundalik odatlari va ovqatlanish ma’lumotlariga tayanib, individual wellness-reja tuzadi, “aqlli” treking orqali uning bajarilishini kuzatadi. Yana bir muhim jihat — Pro2Score deb atalgan maxsus baholash tizimi orqali insonning umumiy holati bo‘yicha natijalarni tushunarli qilib beradi.
Ronalduning o‘zi ham bu ishni “tabiiy davom” deb atagan: u Herbalife bilan 2013-yildan beri hamkor, endi esa faqat reklamada emas, “ichkaridan” ham qatnashmoqchi. Ya’ni — brend yuzi bo‘libgina qolmay, platforma o‘sishiga ham ta’sir qilish niyati bor.
Yana bir qiziq nyuans: Herbalife Pro2col’ni bosqichma-bosqich beta tarzda ishga tushiryapti. Hozircha xizmatga kirish AQSH, Kanada va Puerto-Rikodagi distribyutorlar hamda mijozlar uchun ochiq. Kompaniya 2026-yilda beta qamrovini boshqa bozorlarga, jumladan, ayrim EMEA hududlariga ham kengaytirishni rejalashtirgan.
Qisqasi, Ronaldu “men bu yerda baxtliman” deganda faqat maydonni emas, texnologiyani ham nazarda tutganga o‘xshaydi: futbolda rekord quvish — odat, endi sog‘lom hayotda ham rekord quvish boshlanyapti.
“Zamin”ni Telegramʻda oʻqing!
