Matiz avtomobilida o‘zini videotranslyasiya qilayotgan qiz YTHga uchrab, vafot etdi

23 mart kuni Qozon shahri yaqinidagi trassada avtomobil boshqaruvi vaqtida o‘zini ijtimoiy tarmoq orqali videotranslyasiya qilayotgan 22 yoshlik qiz YTHga uchrab, voqea joyida halok bo‘ldi. Bu haqda “Tatar-inform” nashriga tayanib “Qalampir.uz” sayti xabar bermoqda.

Fuqaroning qo‘l telefoni avtomobildagi uyali aloqa vositasi joylashtiriladigan maxsus qurilmaga mahkamlangan edi. U Daewoo Matiz avtomobilida ketayotib, ijtimoiy tarmoqqa kirgan. Hayotining so‘nggi soniyalari muhrlangan ushbu videoda 22 yoshli qizning tarmoq foydalanuvchilari bilan salomlashgani, ulardan hol-ahvol so‘ragani, qandaydir qo‘shiqni kuylab ketayotganini ko‘rish mumkin. Kutilmaganda to‘qnashuv ovozi, kimdir qichqirgani eshitilgan, keyin esa aloqa uzilgan.

Taxminlarga ko‘ra, u katta tezlikda ketayotib, boshqaruvni yo‘qotgan va qarama-qarshi yo‘lakka chiqib, avtobus bilan to‘qnashgan. 22 yoshli qizning tez tibbiy xizmat yordami kelguniga qadar joni uzilgan.

Tatariston Respublikasi Sog‘liqni saqlash vazirligi bergan ma’lumotlarga ko‘ra, avtobus yo‘lovchilari orasida 5 kishi turli darajadagi tan jarohatlarini olishgan. Ular orasida 7 yoshli bola ham bo‘lgan.

Tez tibbiy yordam xizmati guruhi ularni Zelenodolskaya tuman markaziy shifoxonasiga olib ketishgan. “Zamin”ni Telegramʻda oʻqing!