Seuldagi oʻzbekistonlik qiz fojiasi boʻyicha elchixona rasmiy bayonot berdi
O‘zbekistonning Seuldagi elchixonasi Janubiy Koreyada vafot etgan hamyurtimiz Kim Nozima Akmal qizining o‘limi yuzasidan rasmiy bayonot berib, holat nazoratga olinganini ma’lum qildi. O‘tkazilgan sud-tibbiy ekspertizasi va tergov xulosalariga ko‘ra, marhumaning o‘limida qotillik alomatlari aniqlanmagan va hodisa ehtimoliy o‘z joniga qasd qilish sifatida baholanmoqda. Marhumaning onasi ishtirokida o‘tgan uchrashuvda barcha dalillar va video yozuvlar ko‘rsatilib, ijtimoiy tarmoqlardagi asossiz ma’lumotlarga ishonmaslik so‘ralgan. Hozirda tergov harakatlari elchixona va Koreya politsiyasi hamkorligida davom ettirilmoqda.
Janubiy Koreyada vafot etgan oʻzbekistonlik Kim Nozima Akmal qizining oʻlimi boʻyicha tarqalayotgan turli tasdiqlanmagan maʼlumotlar ortidan Oʻzbekistonning Seuldagi elchixonasi rasmiy bayonot bilan chiqdi. Holat hozirda huquq-tartibot organlari nazoratida oʻrganilmoqda.
Elchixona maʼlumotiga koʻra, voqea sodir boʻlgan kundan boshlab Koreya politsiyasi bilan yaqin hamkorlik yoʻlga qoʻyilgan. Tergov jarayoni xolis va toʻliq oʻtkazilishi uchun barcha choralar koʻrilmoqda.
Shu maqsadda marhumaning onasi Feruza Alimbekova Koreyaga taklif etilgan va u yerda rasmiy uchrashuvlarda ishtirok etgan. 14 aprel kuni Pyontek shahrida politsiya, advokat va elchixona vakillari ishtirokida muzokara oʻtkazilgan.
Unda tergovning dastlabki natijalari va qoʻshimcha tekshiruvlar haqida batafsil maʼlumot berilgan. Koreya tomonining xulosasiga koʻra, oʻlim holatida qotillik alomatlari aniqlanmagan.
Chuqur tahlillar, shu jumladan sud-tibbiy ekspertiza natijalariga asosan, oʻlim ehtimolan oʻz joniga qasd qilish sifatida qayd etilgani aytilgan.
Tekshiruv jarayonida DNK, qon va barmoq izlari tahlil qilingan, shuningdek, tanada zaharlanish yoki kuchli jismoniy taʼsir izlari topilmagan. Voqea joyi va tibbiy muassasalar videokuzatuv materiallari ham oilaga koʻrsatilgan.
Politsiya ijtimoiy tarmoqlarda tarqalgan ayrim suratlar rasmiy tergovga tegishli emasligini va ularni tarqatish qonunbuzarlik ekanini taʼkidlagan.
Hozirda tergov ishlari davom etmoqda. Oʻzbekiston elchixonasi vaziyatni nazoratda ushlab turibdi va Koreya tomoni bilan hamkorlikni davom ettirmoqda. Fuqarolar esa tasdiqlanmagan maʼlumotlarga ishonmaslikka chaqirilgan.
Izohlar 0
…