Suriyada yangi hokimiyat harbiy infratuzilmani qayta shakllantirishga jiddiy kirishdi. Ahmad ash-Sharaa boshchiligidagi maʼmuriyat Xmeymim aviabazasini Rossiyadan qaytarib olib, uni milliy armiya uchun oʻquv markaziga aylantirishni rejalashtirayotgani maʼlum qilindi.
Kommersant nashrining Damashqdagi manbasiga koʻra, bazani toʻliq harbiy obyekt sifatida emas, balki “hamkorlikda boshqariladigan” va asosan harbiy boʻlmagan vazifalarni bajaradigan formatda ishlatish imkoniyati ham koʻrib chiqilmoqda.
Manba taʼkidlashicha, hozirgi Suriya armiyasi tarkibining katta qismi sobiq isyonchilardan iborat boʻlib, ular toʻliq harbiy tayyorgarlikdan oʻtmagan. Shu sababli Laziqiya viloyatida joylashgan ushbu baza harbiylar tayyorgarligi uchun qulay maydon sifatida baholanmoqda.
Shu bilan birga, Al-Modon manbalariga koʻra, Damashq rossiyalik harbiy instruktorlarni jalb qilishni ham rejalashtirmoqda. Bu qaror armiyada hali ham sovet va Rossiya ishlab chiqargan texnika ustunligi bilan izohlanmoqda. Biroq gap asosan quruqlikdagi kuchlar tayyorgarligi haqida ketmoqda — aviatsiya boʻyicha tayyorgarlik rejada yoʻq.
Maʼlumotlarga koʻra, Bashar Asad rejimi qulaganidan soʻng Rossiya ushbu bazalardan koʻplab strategik qurollarini, jumladan S-300 va S-400 havo mudofaa tizimlari hamda “Bastion” raketalarini olib chiqib ketgan. Rossiya xalqaro ishlar kengashi eksperti Anton Mardasov fikricha, bu holat bazaning harbiy ahamiyatini ancha pasaytirgan.
Hozircha Rossiyaga Xmeymim aviabazasidan Afrika yoʻnalishida logistika maqsadida foydalanishga ruxsat berilmoqda. Biroq siyosiy vaziyatga qarab bu kelishuv oʻzgarishi mumkin.
Eslatib oʻtish joiz, joriy yil yanvar oyida Damashq Rossiyadan Qamishli bazasidan ham qoʻshinlarini olib chiqishni talab qilgan edi.
Qisqacha aytganda, Suriyada harbiy balans va tashqi taʼsirlar qayta taqsimlanmoqda. Xmeymim atrofidagi qarorlar nafaqat mamlakat, balki butun mintaqaning geosiyosiy kelajagiga taʼsir qilishi mumkin.
“Zamin”ni Telegramʻda oʻqing!
