Aprel oyi davomida Ukraina qurolli kuchlari tomonidan amalga oshirilgan dron hujumlari natijasida Rossiyaning 38 ta havo mudofaa tizimi yoʻq qilingani haqida maʼlumot berildi. Bu haqda Ukraina tomoni rasmiy bayonotda bildirgan.
Ukraina harbiy manbalariga koʻra, zarba ostida qolgan tizimlar orasida “Tor”, “Buk” va “Pantsir” kabi zamonaviy havo mudofaa komplekslari ham mavjud. Shuningdek, radar stansiyalari va radioelektron kurash vositalari ham nishonga olingan va katta zarar koʻrgan.
Maʼlumotlarda qayd etilishicha, ushbu operatsiyalar asosan dronlar yordamida amalga oshirilgan boʻlib, ular dushman mudofaa tizimlarini aniqlash va zararsizlantirishga yoʻnaltirilgan. Natijada Rossiya havo mudofaa infratuzilmasiga sezilarli yoʻqotish yetkazilgani aytilmoqda.
Ukraina tomoni bu kabi zarbalar strategik maqsadga ega ekanini taʼkidlab, ularning asosiy vazifasi Rossiya mudofaa tizimlarini zaiflashtirish hamda kelgusida chuqurroq hududlarga zarba berish imkoniyatini kengaytirishdan iborat ekanini bildirgan.
Dastlabki hisob-kitoblarga koʻra, yetkazilgan umumiy zarar miqdori qariyb 1,1 milliard dollar atrofida baholanmoqda.
Mazkur maʼlumotlar urush sharoitida tomonlar tomonidan berilayotgan rasmiy bayonotlarga asoslangan boʻlib, mustaqil manbalar tomonidan toʻliq tasdiqlanmagan.
“Zamin”ni Telegramʻda oʻqing!
