Rossiya prezidenti Vladimir Putin yaqin kunlarda Xitoyga rasmiy tashrif bilan yo‘l oladi. Kreml bergan ma’lumotga ko‘ra, ushbu tashrif 19–20 may kunlariga belgilangan bo‘lib, u ikki davlat o‘rtasidagi strategik aloqalarni yanada mustahkamlashga qaratilgan.
Ma’lum qilinishicha, ushbu safar ramziy ahamiyatga ham ega. Sababi, u Rossiya va Xitoy o‘rtasida imzolangan yaxshi qo‘shnichilik, do‘stlik va hamkorlik to‘g‘risidagi muhim shartnomaning 25 yilligiga bag‘ishlanadi. Bu hujjat yillar davomida ikki davlat munosabatlarining asosiy tayanchi bo‘lib xizmat qilib kelmoqda.
Tashrif davomida Si Szinpin va Vladimir Putin o‘rtasida keng qamrovli muzokaralar o‘tkazilishi rejalashtirilgan. Unda ikki tomonlama aloqalarni rivojlantirish, siyosiy hamkorlikni chuqurlashtirish hamda “har tomonlama strategik sheriklik”ni yangi bosqichga olib chiqish masalalari muhokama qilinadi. Shuningdek, yetakchilar global va mintaqaviy kun tartibidagi dolzarb masalalar yuzasidan ham fikr almashadi.
Muzokaralar yakunida qo‘shma bayonot qabul qilinishi, shuningdek, bir qator muhim ikki tomonlama hujjatlar imzolanishi kutilmoqda. Bu esa Rossiya–Xitoy munosabatlarida yangi bosqich boshlanishidan darak berishi mumkin.
Safar doirasida Putin Xitoy Davlat kengashi rahbari — bosh vazir Li Syan bilan ham uchrashadi. Mazkur uchrashuvda savdo-iqtisodiy hamkorlikni kengaytirish, investitsiya loyihalari va o‘zaro iqtisodiy aloqalarni rivojlantirish istiqbollari muhokama qilinadi.
Eslatib o‘tamiz, Vladimir Putinning Xitoyga so‘nggi tashrifi 2025 yilning avgust oyi oxirlariga to‘g‘ri kelgan edi. O‘shanda ham tomonlar strategik hamkorlikni mustahkamlashga alohida urg‘u bergan.
Mutaxassislarning fikricha, bu galgi tashrif ayniqsa muhim bo‘lishi mumkin. Chunki hozirgi global siyosiy vaziyatda Rossiya va Xitoy o‘rtasidagi yaqinlashuv nafaqat ikki davlat, balki butun mintaqa va xalqaro maydondagi kuchlar muvozanatiga sezilarli ta’sir ko‘rsatishi ehtimoldan xoli emas.
“Zamin”ni Telegramʻda oʻqing!
